KRALENDIJK – Algun persona a aserka un reportero di Radio Live 99.9 FM i a pidi pa saka potrèt pa mustra otronan kiko ta pasando, e área patras di kaya Hulanda parti sùit. Den a área patras di kaya Hulanda tin diferente garashi pa drecha entre otro outo. Na hopi okashon loke ta hopi visibel na Boneiru, kaminda tin lugá ta atendé ku drechamentu di outo, su alrededor ta yena ku outo. E suidadanonan a bisa ku den e área ya menshoná no ta un eksepshon. Ta parse ku a krea un sitio nobo pa depositá shushi. Kantidat di outo òf manera nan ta bisa sobrá di outo i potoshi pa nan kuenta. Pa korona e obra, banda di e kolekshon di outo ku tin pa nan kuenta na e sitio, a inisiá fase 2 di e potoshi. Awor ta depositá saku di sushi entre e outonan bieu na e sitio. Sigur un situashon a-higiéniko ku ta rekerí atenshon. E konsekuensia di e ruinanan na e sitio, ta e lugá perfekto pa entre otro djaka, kakalaka, raton i otro bestianan indeseá. E hendenan a menshoná ku nan ta spera pronto gobièrnu aktua i stòp e forma iresponsabel ku esnan responsabel ta aktuando.  

Share This
error: Content is protected !!