KRALENDIJK – Djadumingu anochi Pasku di Resurekshon artistanan lokal a uni i organisá un konsierto ku a karga e nòmber “Un Anochi pa Gradisí”. Kantantenan konosí na Boneiru entre otro Angelique Nicolaas, Gilberto ‘Beto’ Martis, Maresa Pieter, Tio Roly Casimiri, Magindra Clarenda, Zahid Frans, Semi Marten, Almahir Nicolaas, Gabi Simon, Jurnick Clarenda, Angynel Rosinda i Gerald Alberto. Meta di e konsierto di gòspel tabata pa gradisí Señor ku Boneiru ta liber di “Corona Vírùs”, i pa E sigui protehá i guia nos. Tambe pa sostené nos hermana islanan i mundu kompletu ku ta pasando den momentunan difísil pa ku e situashon di COVID-19. T’asina ku e konsierto a ranka sali algun minüt pasa di 7’or di anochi i a tèrminá 9’or di anochi. Un show ku for di promé piesa gòspel a hala atenshon te ku e último. Kada un artista kantando ku hopi fe. E grupo di músiko ku a kompañá e kantantenan tabata: Almar Nicolaas, Riley Molina, Derrel Frans, Janou Troeman, Danny Rosinda, Robert Felida i Jurven Clara. Debí na reglanan ku EBT a introdusí, a transmití e anochi den kada kas di famia pa medio di ‘Live Streaming’ riba Facebook, kanal di televishon NosTV, Radio Live 99.9 FM, Radio Bon FM 102.7, i Radio Vishon 97.1 FM. Nan a transmití e konsierto di “gòspel” bibu i direkto. Un kantidat di mas ku 500 persona for di Boneiru, Kòrsou, Aruba i Hulanda a sigui e konsierto ‘Live’ riba ‘Facebook’ i diferente komentario positivo pa tur ku a hasi e anochi posibel. Boneiru mester ta mas ku orguyoso di su artista i músikonan. Un pabien ta bai na e organisadónan i tur ku a hasi e anochi posibel.

Share This
error: Content is protected !!