KRALENDIJK – Ayera djamars 14 di aprel, taksistanan a reuní den Parke Wilhelmina pa papia ku entre otro diputado James Kroon relashoná ku e situashon fastioso di ‘corona virus’. Radio Live 99.9 FM a papia ku Ronny Bernabela i Stanley Balentin. Nan tabata esnan ku a papia ku prensa relashoná ku loke a sosodé. Bernabela di taksi 28 a menshoná entre otro ku nan ta presente na e sitio pa mustra nan prekupashon i un posibel ayudo. “Taksista ta e promé grupo ku a haña gòlpi relashoná ku vírùs di ‘corona’. Nos a sigui diferente enkuentro ku prensa, sinembargo nos no a tende nada kiko ta bai sosodé ku taksistanan. Nos a aktivá un komishon di 3 persona, Stanley Balentin, ami i e otro persona ta sufri di kebrante di salu i no por ta presente. Awor ta 30 dia sin trabou i esaki ta un situashon hopi difísil pa taksistanan. Diputado tabata presente i a duna tur atenshon, ku e ta bai huntu ku otronan pa atendé pa yega na un solushon mas rápido posibel.

Personalmente mi ta haña ku Hulanda ta hasi e kosnan difísil. Hulanda a manda sèn, sinembargo esaki no ta konta pa taksistanan, ”Bernabela a menshoná. Despues a papia e atardi Balentin i e a menshoná ku no tin entrada pa taksistanan. “Nos a tuma nota ku Hulanda a yega na e palabrashon pa duna taksistanan aya 4000 Euro i Aruba ta bai duna taksistanan di e isla 4000 florin. Nos tambe a papia i yega na e idea pa na Boneiru nos haña 4000 dòler pa taksistanan. Nos a splika gobièrnu e situashon i bisa nan ku nos ke 4000 dòler pa 3 luna. Miembronan di konseho insular a bai di akuerdo pa paga taksista e suma menshoná. A amplia e grupo ku ta bai duna sèn, entre otro piskadónan, sinembargo CFT a menshoná ku esaki no por. Mester kap esaki den algun parti.

Mientrastantu no a tende nada mas i taksistanan ta mira dia ta pasa, i un mas ku otro nan ta sinti e nesesidat di nan entrada ku nan no tin mas. Nos a pidi gobièrnu pa nos haña un ‘voorschot’ i keda pendiente pa e suma kaminda taksistanan ta bai haña e montante di 4000 dòler pa 3 luna. WEB, Telbo i Flamingo TV no ta bai kita esaki for di taksistanan te momentu ku nan risibí e sèn pa nan paga loke nan ta den nesesidat i nan lo kanselá tur nan debenan. Esaki sigur ta di apresiá. Nos ta satisfecho loke nos a tende di diputado i personalmente mi ta hopi kontentu apesar di e krísis gran parti di taksista a presentá. Covid-19 ta algu malu, sinembargo el a trese kos bon tambe. Awor pa dilanti nos ta bai struktura e instituto di taksistanan i pone stabil riba pia,”Balentin a finalisá bisando. 

Share This
error: Content is protected !!