KRALENDIJK – Djamars atardi kantidat di taksista a presentá na ‘Wilhelmina Plein’ pa mustra nan prekupashon pa loke ta trata nan parti finansiero. Ronny Bernabela i Stanley Balentin a papia e atardi ku diputado James Kroon i prensa presente, den presensia di mayoria di taksista. Bernabela a menshoná ku e ta deseá pa Ramoncito Booi regresá den polítika i atendé kos pa Boneiru. Bernabela: ”Un persona ku sigur por yuda nos ta Booi. Hopi ta kritik’é, sinembargo e ta e hòmber ku a hinka nos den Hulanda i e si sa kon atendé ku e hulandesnan. Hendenan asina nos mester awor den polítika. Mi no ke desgabá otro polítikonan, sinembargo no tin un figura manera Booi, momentu ku e yega Hulanda, nan ta tendé i respet’é. Si Booi tin un bon tim, sigur nan ta yuda Boneiru for di den e situashon aktual. Ta di lamentá ku e hendenan aki no ta aktivo den polítika. Momentu ku Booi a kuminsá atendé kosnan pa un Boneiru nobo, otronan a tumba gobièrnu den pasado strob’é di kaba pone tur kos na òrdu. Mi ta pidi gobièrnu di Boneiru pa buska e mihó hendenan pa yuda nos. No bisa Hulanda ta yuda, i esei no ta e kaso, ”Bernabela a menshoná.   

Radio Live 99.9 a papia ku Ramoncito ‘Monchi’ Booi relashoná ku loke Bernabela a menshoná. Booi:”Bèrdat mi a tuma nota loke Bernabela a menshoná di mi persona. Ta Bernabela su opinion i mi ta respetá e gobièrnu aktual. For di 2010 mi no ta den gobièrnu komo polítiko, i lo no regresá den polítika. Mi no tabatin kombersashon ku Bernabela  riba e tópiko aki, i ta Berneabela su pensamentu i deseo. Ami lo no bai atendé ku polítika mas. Tempu a pasa i awor ta momentu pa otro kos den bida,”Booi a menshoná relatá riba loke Bernabela a menshoná di Booi den ‘Wilhelmina Plein’ djamars último.

Share This
error: Content is protected !!