KRALENDIJK – Un suidadano prekupá a presentá na ofisina di Radio Live 99.9 FM, pa ekspresá su malkontentu. El a bisa entre otro ku el a mira ku taksistanan a uni i papia ku diputado pa nan haña sèn. “segun ami a komprondé nan a papia pa haña 4000 dòler. Nada kontra esaki, sinembargo ta bon pa repartí e sèn igual pa tur esnan den nesesidat,” e suidadano a konta. El a sigui bisa: ”Ta bon pa atendé e asuntu di pagamentu di plachi di number i duna espasio pa paga esaki, mirando ku no ta tur hende tin sèn pa kubri gastu di entre otro number di outo. Mi ta sinti falta di un persona di gobièrnu, kisas un diputado, pa sali i splika kla pa tur suidadano sa kiko ta kiko. Tur parti di mundu ta bisa pa bisti ‘mond kapje’, tene kuenta ku distansha sosial, ta papia di e repatriashon di kasi 50 hende ku ta na kaminda ku KLM. Pero niun hende no ta papia di e sèn ku a primintí komunidat, na unda esei a keda? Mi a bai ofisina di SZW i a splika ku mi ta un persona ku ta traha den horeka i ya pa un luna ta na kas sin salario. Mi a yena tur informashon nesesario sinembargo no a risibí niun sèn. Nan a menshoná ku ta haña e sèn den 2 parti, sinembargo te awor 17 di aprel nada. Ni sikiera un yamada pa informa kon e petishon ta kanando. Ta bon pa un persona di gobièrnu, sea diputado of e departamentu konserni pa splika mihó kiko ta kiko di e montante ku e suidadano ta risibí i ken ta esnan ku ta haña supsidio. Hulanda a manda sèn, pues mester partié pa tur hende ku ta den nesesidat haña parti di dje,” e suidadano a menshoná.     

Share This
error: Content is protected !!