KRALENDIJK – Gezaghèber di Boneiru Edison Rijna a dirigí palabra pa komunidat relashon ku desaroyonan rondó di vírùs di ‘corona’. “Djaluna 20 di aprel momentu ku mi ta bai papia ku pueblo, a hasi 180 tèst i for di nan 2 a resultá positivo di ‘COVID-19’, ‘corona virus’. Anterior mente tabatin poko konfushon tokante e promé kaso. E kaso ta ku 2 hende tabatin kontakto ku otro. E informashon ku nos tin awor, ta konsiderá ámbos kaso positivo. Investigashon relashoná ku e 2 kasonan ku ta positivo pa vírùs di ‘corona’, a atendé ku tur esnan ku tabatin kontakto ku e 2 persona ku tin e vírùs. Ta konosí awor ku esnan ku tin e vírùs no por infektá otro hende. Un di e personanan infektá ku e vírùs ya a rekuperá kompletamente i e otro ta rekuperando stabil. Investigashon ta mustra ku e hendenan a keda infektá ku e vírùs den pasado. Pa tur klaridat, awor a pasa di 1 kaso pa e di 2 kaso. Tin un di tres kaso pendiente. Ta trata di un persona ku a drenta hospital resientemente i tin problema ku pulmonia, loke por ta indiká ku e ta infektá ku ‘COVID-19. A tèst e persona e dia nan ku a pasa, i tur 2 bia e tèst a sali negativo. Tin diferente investigashon ta tumando lugá, relashoná ku e situashon. Ta plania pa hasi un di 3 tèst serka e persona. Pa tur seguridat ta tratando e kaso di e persona unu di ‘COVID-19’. Esei a pone ku a inisiá un investigashon di tur esnan ku tabata den kontakto ku e persona. E hendenan ku tabatin kontakto ku e persona a bai den karentena. A isolá e persona i ta pendiente di resultado di e último tèstnan di e persona. Tur tres persona ta di Boneiru. Esaki sigur ta trese mas pregunta, sinembargo manera primintí, mi ta komuniká di un forma habri i transparente ku komunidat. Pa awor e informashon ku mi a menshoná nos ta disponé di dje, i por duna komunidat. No por bisa adelante kon e vírùs ta komportá su mes. Desaroyonan ta tumando lugá un tras di otro. Pa awor no ta bai tuma medida èkstra. Momentu tin mas informashon di e kaso ku ta pendiente, ta informá komunidat, i si ta nesesario pa tuma medida mas severo. Mi ta hasi un yamada na un i tur, pa keda trankil, kumpli ku regla i medidanan ya menshoná,” gezaghèber Rijna a menshoná papiando ku komunidat.   

Share This
error: Content is protected !!