KRALENDIJK – Ayera atardi gezaghèber di Boneiru Edison Rijna a hasi un yamada na tur miembro di prensa pa e papia ku nan. No ta trata di algu pa bai den notisia, sinembargo pa e ekspresá algun situashon ku último simannan ta sosodé, sigur relashoná ku e problema mundial di ‘corona virus’.  E enkuentro a tuma lugá riba patio di ofisina prinsipal di gobièrnu yama BC.

Durante e atardi el a menshoná entre otro pa prensa trankilisá komunidat. “Mi ta konsiente ku prensa tin hopi poder i mi ke pa kada media usa e poder pa trankilisá pueblo i no solamente informá, sinembargo eduká komunidat. No por kompará Boneiru ku Aruba i Kòrsou. Nan situashon ta totalmente diferente. Boneiru ta stabil ku 1 òf 2 hende ku síntoma di e vírùs, sinembargo nada di gravedat. Nan situashon di salu ta stabil, danki na Dios,” gezaghèber Rijna  a menshoná.

Gezaghèber a duna number di telefon adishonal, hasiendo e situashon mas fásil pa miembronan di prensa. Pues awor pa dilanti momentu ku ta sirkulá algu den pueblo, no mester trese spekulashon i miedu. Bèl hasi pregunta i informá pueblo. Ta bai duna oportunidat pa kada miembro di prensa hasi 2 pregunta momentu ku tin enkuentro ku prensa relashoná ku vírùs di ‘corona’.  Gezaghèber a sigui bisa:”E kos Importante ta pa mantené e distansha sosial di por lo ménos 2 meter, pa evitá si e vírùs ta na Boneiru e no plama. Ta posibel pa hende por bai hasi kompra, teniendo kuenta ku e medidanan ya menshoná. Si nos kumpli ku e reglanan ta bon pa kada un di nos den komunidat, “entre otro gezaghèber Rijna a menshoná pa miembronan di prensa presente. Otro kos ku a menshoná e atardi ku a registrá miembronan di prensa aktual, pa evitá momentu ku organisá un enkuentro ku prensa, hopi hende ta presentá i bisa ku nan tambe ta forma parti di prensa. 

      

Share This
error: Content is protected !!