KRALENDIJK – Kapitan di haf na Boneiru Sr. Gunther Flanegin a papia ku Radio Live 99.9 FM, den un entrevista durante e programa radial ‘Brunch 99’. Flanegin a duna un bista di e situashon aktual kon tur kos ta kanando pa loke ta trata aktividat den bahia di Kralendijk. A sera e parti di waf ya pa algun siman, e mes un dia ku a sera aeropuerto di Boneiru. Pues hende no por yega e isla pa medio di laman i solamente karga por drenta Boneiru. Karga si por drenta, sinembargo mester tene nan mes na e reglanan èkstra awor relashoná ku e krísis di vírùs di ‘corona’. 

Duane i Kmar ta atendé ku boto ku no ta sigui òrdu momentu ku nan ta na Boneiru. E yate grandi mara na waf Chicu Mercelina tabata tei promé ku a sera e área teritorial marítimo. E yate no por a bai debí ku nan no tin un kaminda pa bai. Boneiru tin kontakto ku diferente isla den área di Karibe. Pues si un barku ta deseá di sali pa bai un otro isla den Karibe, tin bon komunikashon i no ta pèrmití pa bai otro kaminda, i den kaso di otro isla nabegá bin Boneiru.

Tin algun boto ku a yega despues ku a sera e wafnan, debí ku nan tabata riba laman i a tuma desishon pa bin Boneiru, relashoná ku e situashon di e vírùs ku a presentá. E hendenan mester keda 14 dia riba e boto i despues nan por baha for di e boto, si tur e kontròl ku nan a pasa ta duna un bista ku nan no tin niun síntoma straño. Loke a sosodé tokante e situashon ku e señora ku a bandoná su yate ta difísil pa kontrolá tur boto. Ta bai na e botonan, sinembargo no por ta presente tur kaminda. E boto ku e señora tabata riba dje, ta na Boneiru for di 5 di aprel i nan a kaba di pasa e temporada ku nan tabata den karentena. Esnan konserní a atendé korekto ku e persona i tur kos a kana bon. Awanan teritorial ta sera te fin di aprel, dependé kon e situashon na Boneiru keda. 

Ku tur probabilidat ta bai alargá pa e wafnan keda sera pa barku òf boto ku ta trese hende Boneiru. Ta posibel pa hende bai piska òf hasi un paseo ku boto solamente mester tene kuenta ku e regla i no bai laman ganchu, esta sali for di e teritorio di Boneiru,”Flanegin a bisa. El a finalisá bisando pa momentu ku un persona tuma nota ku algu straño ta pasando riba laman, pa avisá polis, duana, Kmar òf havenmeester na number di telefon 7178151.   

Share This
error: Content is protected !!