KRALENDIJK – Kolegio Ehekutivo den un karta dirigí na hunta di Komisario i gerensia di Bonaire Holding Maatschappij NV ta reakshoná riba e karta ku resientemente a wòrdu mandá pa Sekretario di Estado, Raymond Knops, i Parlamento Hulandes:

Apresiabel Hunta di Komisario i Gerensia,

Ku referensia na e karta di e gerente temporal di BHM NV pa sekretario di estado sr Raymond Knops ku fecha 14 di aprel 2020, nos ta informá bo lo siguiente.

Ku desapunto i asombro nos a tuma nota di kontenido di e karta di kua a manda cc pa e gerensianan i e Huntanan di Komisario di BHM, TCB, TELBO, Selibon, BONLAB, BOG, Konseho Insular, Representante di Reino interino, USIBO, Komishon di Tweede Kamer pa Relashonnan den Reino, i Tweede Kamer. Nos a komprendé ku e gerente temporal mes tambe a manda e karta aki pa medionan di komunikashon lokal.

Entretantu desde novèmber 2019 nos a tuma hopi akshon pa siendo akshonista aktivo desaroyá un bon relashon ku nos kompanianan di gobièrnu i sigur nos ta konsiente ku konhuntamente ainda tin hopi trabou pa hasi. Tur dia nos ta traha riba esaki. For di e karta nos ta lesa ku e gerente temporal di BHM NV tin problema ku e eskoho ku Kolegio Ehekutivo a hasi pa duna forma na su ‘governance’. E eskoho no solamente a bini despues di rekomendashon di e rapòrt di crmliNK (riba enkargo di BZK), pero tambe Kolegio Ehekutivo konsientemente a skohe pa sigui mayoria di e munisipionan di Hulanda. Esakinan tambe ta hasi nan ‘governance’ den e departamentunan ku a keda establesé pa e meta aki. Pa e gerente temporal, despues di a aseptá e tarea aki, públikamente ekspresá su insatisfakshon i krea sospecho tokante eskoho i manera di traha di Kolegio Ehekutivo (i den e kalidat ei akshonista), no ta na interes di e Kompania Anónimo i Entidat Públiko Boneiru. Banda di esei Kolegio Ehekutivo ta responsabel pa e sistema independiente di traha. Den e karta ta akusá e ‘kwartiermaker’ di hopi kaso. Nos ta distansiá nos mes di e asumshonnan fuerte i inkorekto aki di e gerente temporal.

Dentro di poko nos lo yama un reunion di akshonista i pone e tópiko aki riba agènda. Alabes e funshonamentu di BHM NV tambe ta bou di atenshon grandi relashoná ku e rekomendashonnan ku e rapòrt ta deskribí. E reunion di akshonista ta e úniko órgano pa papia tokante kompanianan di gobièrnu i di e manera ei duna importansia na ‘good governance’.

Mirando e firma bou di e karta, por lo pronto nos ta asumí ku e ekspreshonnan den e karta ta pertenesé solamente na e gerente temporal i no ta prosedente di e Hunta di Komisario di Bonaire Holding Maarschappij NV. Nos ta hasi un yamada riba bo pa ehersé tantu e interes públiko komo e interes empresarial di BHM NV na un manera responsabel.

Atentamente,

E karta ta firmá pa gezaghèber Edison Rijna i Sekretario Insular.

Share This
error: Content is protected !!