KRALENDIJK – Ehekushon di diferente palabrashon tokante di kon pa atendé ku trafikashon humano i transporte ilegal di hende na Hulanda Karibense mester ta mihó. Na promé lugá ta falta bista riba índole i tamaño di trafikashon humano i transporte ilegal di hende. Esaki e Konseho pa Mantenshon di Lei (“Raad voor de Rechtshandhaving”) ta konkluí den su investigashon ‘Aserkamentu di trafikashon humano i transporte ilegal di hende’.

Trafikashon humano ta un forma di eksplotashon i un delito kontra libertat personal. Na momentu di transporte ilegal di hende, ta papia di brinda asistensia pa krusa frontera di un manera ilegal. Den Reino tin palabrashonnan hasí pa kombatí i evitá e delitonan grave aki. E Konseho ta positivo tokante di e palabrashonnan hasí. E ehekushon den práktika sinembargo mester ta mihó.

Esaki ta konta espesialmente pa e registro di tema anunsiá na 2017, un registro ku mester bai duna bista riba índole i tamaño di trafikashon humano i transporte ilegal di hende na e islanan Boneiru, Sint Eustatius i Saba ku ta forma Hulanda Karibense.

Den e registro aki mester pone huntu señalnan di tur organisashon embolbí pa despues analisá esakinan. Tres aña despues ainda e registro aki no ta introdusí na un bon manera. E Konseho ta konsiderá e registro di tema ku no ta funshoná, komo un opstákulo i rísiko pa aserkamentu di e kadena kompletu di trafikashon humano i transporte ilegal di hende.

E Konseho a hasi ocho rekomendashon na e Minister di Hustisia i Seguridat di Hulanda. E Konseho ta rekomendá pa e kooperashon por ehèmpel na Hulanda Karibense, Kòrsou i Sint Maarten pa nan traha na realisashon di un posishon di informashon konhunto i regional (Karibense) riba tereno di trafikashon humano i transporte ilegal di hende. Pa introdukshon i uso real di e registro di tema, segun e Konseho mester nombra un lider di proyekto dispensá ku regularmente ta informá tokante di e progreso.

E krisis di corona aktual por tin konseskuensia direkto pa trafikashon humano i transporte ilegal di hende. E burdel na Boneiru ta será i ta opvio ku prostitushon por ta move pa e sirkuito ilegal. Ademas e rísiko ta grandi ku mas hende ilegal ta krusa via laman drenta Karibe fo’i Venezuela. Motibu sufisiente pa mas lihé posibel sigui e rekomendashonnan.

E Konseho ta pendiente di reakshon di minister di Hustisia i Seguridat di Hulanda riba su rapòrt.

Konseho lo sigui ehekushon den praktika ku hopi atenshon i interes. E lo inkluí esaki den un investigashon di inspekshon ku mester kuminsá ampliamente na 2020 ku tin di aber si sigui rekomendashonnan dor di organisashonnan hudisial den Hulanda Karibense.

E rapòrt di inspekshon di e Konseho ta públiko. Esaki ta riba e página wèp di e Konseho: www.raadrechtshandhaving.com

Share This
error: Content is protected !!