KRALENDIJK – Gezaghèber a bisa na mas ku un okashon ku ainda un ‘lock down’ no ta nesesario. Tambe gezaghèber ta keda enfatisá ku nos mester tene nos mes na e medidanan ku no ta hopi; laba man, no aglomerá, tene distansia di un meter i mei, tosa den kokoti man i keda kas. Na Kòrsou i Aruba tin toke de keda. Mi no sa ku Bonaire a konosé un toke de keda. Komostudiantemi a pasa den toke de keda na Kòrsou despues di di 30 di mei 1969. Awèl mi por bisa bo ku e kos ei no tabata nada dushi. E promé barku ku a sali pa Bonaire mi a subi abordo. Si abo ke eksperensiá kiko e ta, sigui tene fiesta, evenementu, forma grupo bai gosa na kunuku, kologá na snèk, diskutí kon malu e informashon ta, ku ta skonde kos, ku gezaghèber no ta papia bèrdat,ku Dios ta protehé Bonaire, selebrá dia di Rei, di Rincon, di Obrero i kuater di mei. Si ta eseinan nos ke anto no ta keda e gezaghèber ku no ta duna informashon, ku ta gaña, ku ta tapa i skonde kos disidí ku entrante djaluna 27 di aprel 2020 ta inisiá ku toke de keda. Kiko nos lo bisa na boka grandi; T’ami libertat, a kita mi privasidat, ta Hulanda a disidí, Bonaire a bira un pais di diktadura. Pero dikon mester yega asina leu? Desobedensia ta afektá Bonaire su ekonomia, finansa, enseñansa, salubridat i ta krea desempleo i intoleransia. Si nos ke i ta dispuesto i konsiente pa pone un fin na e Bonaire ku nos tur i asta bishitantenan ta bisa di ta stima, mi tambe lo tin ku bebe e beker di venenu manera Socrates, muri na krus manera Hesus, keda asesiná manera;Abraham Lincoln, Gandhi i Martin Luther King jr. Nan tur tabatin un soño. Gezaghèber “Pordoná nan pasobra nan no sa kiko nan ta hasi”

Arthur Sealy 

Share This
error: Content is protected !!