KRALENDIJK – Radio Live 99.9 FM a kombersá ku Francisco ‘Bubuchi’ Janga, yu di e konosido Broertje Janga, kende a bai nos dilanti. ‘Bubuchi’ a menshoná ku preparashon tabata kana hopi bon pa e aktividat di dia di Rincon.“2020 tabata e promé aña kaminda selebrashon Dia di Rincon lo tabata organisá riba un dia liber ofisial spesialmente pa e aktividat. Tur kos tabata kana bon i e interes tabata inmenso. Hopi grupo ku ta bin Boneiru for di Kòrsou i Aruba a menshoná pa partisipá. Aparte di gruponan ku ta bin presentá, prensa for di e islanan ariba menshoná a informá ku nan ta bin kubri dia di Rincon 2020. Nan a pèrkurá pa atendé pasashi i lugá di keda. Mirando kuantu aktividat ta bai tin a plania pa kuminsá mas ku un luna delantá ku aktividatnan relashoná ku Dia di Rincon. Entre otro tabatin hopi interes, mas ku 40 partisipante pa e festival ‘Kanto Krioyo 2020’. Tur tabata e motibu ku a pone  mas dia disponibel pa organisá tur aktividat relashoná ku selebrashon Dia di Rincon. Debí na e pandemia di ‘corona virus’, ta obligá nos pa kanselá e aktividat. E meta tras di dia di Rincon ta poko mara na e temporada di kosecha, loke ta hasi difísil pa organis’é riba un otro fecha ku no ta den luna di aprel. E selebrashon di Dia di Rincon ta rekerí hopi hende huntu i balia gosa. Apesar ku yega na un solushon pa e vírùs ku tin mundu trastorná, ta tuma poko tempu pa e hendenan haña konfiansa pa uni i bula di un isla pa otro,”Bubuchi a menshoná. El a finalisá bisando: ”Pa tur esnan ku ta selebrá huntu ku nos Dia di Rincon nos ta biba segun boluntat di Dios. Loke Dios proponé nos ta kana kuné. Awor ta un momentu pa sinta ketu i pensa riba esnan ku ta pasa den difikultat. Kisas abo ta pasa e malesa stabil, miéntras otronan ta sufri. Resa na Tata den shelu pa skapa mundu for di e vírùs. Nos ta topa e siguiente bia ku organisá dia di Rincon,” Bubuchi a bisa. Dia di Rincon ta keda 30 di aprel mientras e fecha tambe lo keda un dia ofisial liber ounke e aña aki no tin selebrashon grandi manera kustumbrá.

Share This
error: Content is protected !!