KRALENDIJK – Manera ya a bira un tradishon, USIBO, e plataforma sindikal lokal na kua e sindikatonan: ABVO, AFBW, BPWU, FEDEBON, NAPB-BES, SIMABO i PWFC ta afiliá, tur aña ta selebrá konhuntamente “Dia di Labor”. E aña aki nos lo no tin e selebrashon manera kustumber debi na e problematiko ku ta asotá mundu kompleto, pa motibu di e pandemia di Covid-19, kousá pa e virus di korona.

Apesar di e situashon aki, Usibo no ke laga e dia aki pasa sin konmemorá e fecha sagrado di “Promé di mei”, ku ta dia di tur persona ku ta presta labor. Sea ku e ta traha ku su mannan, den ofisina, na kas, riba kaya of ta usa su mente. Sea ku e ta yama su mes trahado of obrero, kada persona ku ta laborá, sin distinshon di kua tipo di trabou e por ta ehekutá …… awe ta SU dia…!

Konsiderando e situashon aktual di Pandemia, USIBO ke pone atenshon spesial e aña aki, riba trahadónan den e profeshonnan di médiko, enfermería i di kuido i tambe esnan ku ta laborá den funshonnan di duna protekshon na nos komunidat i esnan ku ta duna tur tipo di servisio esensial. Den e kuadro aki USIBO ke pone atenshon na konvenshon C-155 di ILO, ku ta regardá: “Salú i Siguridat na boka di Trabou”…! “Occupational Health and Safety”.

USIBO for di 2013 a skohe pa un struktura di diálogo entre partnernan ku ta karga e desaroyo sosial-ekonómiko. Esta representantenan di dunadonan, di trabou, representantenan di e forsa laboral i gobièrnu, ku ta responsabel pa desaroyá i ehekutá maneho i fasilitá prosesonan. USIBO a skohe pa e ruta di dialogo, pa por atendé asuntunan di interés komún pa un funshonamentu optimal di nos merkado laboral i logra desaroyo sano i balansá sosial- ekonómiko.

Sinembargo no mester pèrdè for di bista, orígen di konmemorashon di e fecha “Prome di mei”. E fecha sagrado aki pa e klase trahadó, a surgi komo

konsekuensia di e “Masakre” ku a tuma lugá na Chicago riba promé di mei 1886, provoká pa e lucha kontra eksplotashon di e klase trahadó, ku no por a soportá mas e kondishonnan di bida i di trabou bou di kua nan mester a laborá. Komo konsekuensia di esaki a ehekutá algun sindikalista ku a bira e martirnan di Chicago.

Mester trese dilanti den tur sinseridat, ku apesar ku e trahadó tin e derecho legal di organisá su mes, nos a tuma nota ku den diferente sektornan e.o. di turismo, komersio i di konstrukshon, ainda tin un grupo grandi di trahadó ku no ta organisá sindikalmente. Kisas ta pa miedu pa represaya i falta di konsientisashon serka e trahado. Usibo ta hasi un yamada riba tur trahadó pa afiliá na un di e sindikatonan ku tin representashon den e sektor ku bo ta laborá. Uní e klase trahadó ta muchu mas fuerte. “United we stand divided we fall”. Awor mas ku nunka e klase trahadó mester ta uní. Nos ta bai enfrentá tempunan sumamente difisil, kaminda trabou lo ta meskos ku un klòmpi di oro. Lidernan sindikal, lidernan komersial i lidernan gubernamental a duna e bon ehèmpel di por traha hunto den un bon harmonia, ku rèspèt pa otro apesar di diferensia di interesnan. Esaki mester ta un stimulashon pa trahadónan sin miedo organisá nan mes pa asina USIBO por karga nan bos, nan sentimentunan, nan deseonan i tambe nan aporte na mesa di diálogo.

Huntu nos por logra muchu mas ora nos forma un frente solidario. Laga nos mantené e unidat i usa esaki na bienestar di e gremio laboral, sin pèrdè for di bista, bienestar general.

USIBO ta kla pa huntu nos hiba e lucha sagrado na interes di e klase trahado en partikular i e pueblo en general. Den e kuadro aki tambe, USIBO ta reafirmá su kompromiso, pa huntu ku e otro partnernan sosial, representando komersio i gobièrnu, kontinuá ku e proseso di konsertashon den e plataforma di diálogo pa atendé asuntunan di interés komún, pa logra desaroyo sosial-ekonómiko duradero den nos komunidat.

Ku e mensahe aki nos ke desea tur trahadó i tur dunadó di trabou, un Dia di Labor 2020, felís i di reflekshón.

Kòrda kuida….!

Share This
error: Content is protected !!