KRALENDIJK – E diesshete demandantenan ku ta pegá den eksterior i ku a kuminsá un huisio sumario serka Korte di Promé Instansia di Boneiru, Sint Eustatius i Saba, pa demandá di gobièrnu i di gezaghebber di Boneiru pa nan por regresá nan isla bèk, djárason a haña parsialmente rason serka hues mr. R. Gerard. OLB mester sòru pa KLM òf un otro kompania di aviashon trese e demandantenan bèk Boneiru riba un òf mas buelo. Gobièrnu di Boneiru pues ta keda kondená pa paga e gastunan akí di repatriashon. OLB por pidi un kontribushon si di e repatriantenan den forma di e balor di e voucher ku nan ta haña di e kompania di aviashon pa nan buelo anulá. Demas gastunan èkstra si ta pa kuenta di OLB. E demandantenan no ta atmisibel si den nan demanda kontra gezaghebber, asina korte a disidí. Mas aleu kada partido mes mester paga e gastunan di e huisio sumario. Asina e veredikto ta bisa ku a keda pronunsiá awe pa hues mr. R.J.F. Gerard. Korte despues di a studia e dokumentunan entregá ta yega na e konklushon ku e kapasidat di kuido na Boneiru, ta hustifiká un repatriashon den fase. Despues di a realisá e promé buelo riba 17 di aprel, ta intenshon di OLB pa den seis buelo, trese maksimal 80 persona bèk kada bia. E demandantenan no por a fundamentá dikon un kantidat mas haltu ta responsabel. Tambe ta asina ku OLB no por hasi un análisis di riesgo ainda pa motibu di insiguridatnan rondó di e karakterístikanan di e vírùs COVID-19. A base di tur esakinan korte ta haña ku e punto di salida di repatriashon di maksimal 80 persona pa bia ta hustifiká. Pero hues tin problema ku e tempu ku ta tuma, loke ta enserá ku e último buelo lo por tuma lugá te fin di ougùstùs numa. Tampoko korte no ta di kombensí ku mester tuma henter un siman entre e buelonan pa prepará e buddynan i limpia i desinfektá e sitio di karentena. Por gana hopi mas tempu den e planifikashon, loke ta na interes di e demandantenan. Nan mester tene kuenta si ku e posibilidat ku pa motibu di sierto desaroyonan rondó di plamamentu di e coronavírùs, por surgi un situashon ku e kapasidat di kuido na Boneiru no por kumpli mas ku e nesesidat di kuido i ku OLB por hañ’é obligá di ahustá e skema di repatriashon. Segun korte, e kapasidat di kuido limitá ta e úniko hustifikashon pa un repatriashon den fase den e tèmpo ku OLB ta aspirá. Pa loke ta trata e pregunta ken lo mester karga e gastunan di e buelonan di repatriashon, OLB i e demandantenan ta di akuerdo ku otro ku OLB por pidi un kontribushon di e repatriantenan den forma di e balor di e voucher ku hopi pasahero ta haña pa nan buelo anulá, pero ku e demas gastunan èkstra ta pa kuenta di OLB. Asina tin ku lesa e stipulashon ku repatriashon ta sosodé riba gastu di OLB.

Share This
error: Content is protected !!