Kralendijk – Water – en Energie Bedrijf Bonaire  N.V. (WEB) ta anunsiá ku kuminsando promé di mei , lo implementá medidanan di vírus di korona  riba fakturanan di awa di bebe i elektrisidat.

Entidat Públiko Boneiru a pidi atenshon di gobièrnu sentral pa e konsekuensianan di krísis di korona, na mes momento a pidi atenshon pa e tarifanan fiho pa uso di elektrisidat i awa di bebe. Den konseho di minister dia 24 di aprel , 2020 a establesé un medida pa ku e tarifanan fiho. E medidanan aki lo dura 8 luna. WEB lo implementá esakinan.

E konsekuensia di esaki ta ku pa e fakturanan di elektrisidat i awa di bebe pa lunanan di Mei 2020 te ku desèmber 2020 Ministerio di Asuntunan Ekonómiko i Klima (EZK) i  Ministerio di Infrastruktura i Awa (I&W) respektivamente lo paga e tarifa di uso fiho den su totalidat pa tur usuario.E tarifa  pa uso fiho lo wòrdu pone na $0.00.

Pa klientenan di Pagabon , kuminsando 1 di mei te ku 31 di desèmber 2020, e tarifa lo keda meskos ku e tarifa di uso variabel. Esaki lo duna un rebaho adishonal riba e tarifa aktual di Pagabon di USD 0.1106 pa kWh. E deskuentonan aki tambe lo wòrdu paga pa Ministerio di Asuntunan Ekonómiko i Klima (EZK) i e Ministerio di Infrastruktura i Awa (I&W).

Pa un kas ku un konekshon chikitu di elektrisidat i awa di bebe, esaki lo ta un deskuento adishonal di USD 33.26 pa luna. Pa un kas ku un konekshon di Pagabon

ku ta usa 250 kWh por luna i un konekshon chikitu di awa di bebe, esaki ta nifiká un deskuento adishonal di USD 34.73 pa luna. E deskuentonan èkstra lo ta mas haltu pa e konekshonnan mas grandi (generalmente kompanianan). Pa kompanianan usualmente e tarifanan fiho ta mas haltu.

E medidanan aki ta konta solamente pa e tarifa fiho. E tarifa pa uso variabel lo keda mes kos  i lo wòrdu kobrá sin kambio. E medidanan aki  tambe lo wòrdu apliká pa  entregá ku trùk di awa di bebe.E kosto pa transporte   ( USD 0.745 pa m3) ta separá for di e tarifa di uso fiho.

Pa personanan ku apesar di e medidanan ainda tin problema pa paga nan fakturanan di awa i elektrisidat, tin e posibilidat di tuma kontakto ku OLB via meil yudami@bonairegov.com pa por bini na remarke pa ayudo adishonal.

Den kaso ku surgi un kambio den e periodo den  kual e medida lo wòrdu apliká, WEB lo informá su klientenan di esaki na su debido tempu.

E tarifanan vigente di awa di bebe i elektrisidat ta riba www.webbonaire.com.

Share This
error: Content is protected !!