KRALENDIJK – Djaluna mainta 4 di mei, e dia a habri kaminda por a tuma nota di un kantidat di hende prinsipalmente sperando “Maduro & Curiel’s Bank” (MCB), Telbo i WEB habri porta pa duna servisio na kliente. Promé ku e ofisina habri porta, hendenan ta pendiente na e sitio. Na MCB tabatin un kantidat di hende, un parti bou di tènt i otronan den solo manera ta bisa. Na Telbo klientenan ta kompletu den solo mirando ku no tin tènt pa para of sinta bou di dje. Radio Live 99.9 FM despues di algun yamada a akudí i kombersá ku algun persona na e sitionan i por konkluí ku e situashon tin di aber ku hopi hende no ta atendé ku e forma di hasi pago pa medio di “online banking”. Pa e motibu aki ta krea aglomerashon di hende na e banko, pa hasi pago di entre otro WEB i Telbo. Tin di e kompanianan ta manda nan kliente pa hasi e pago via banko pa evitá aglomerashon na nan ofisina. Último tempu no solamente banko, sinembargo diferente otro kompania ta ofresé forma di paga “online”, loke ta evitá ku e persona mester bai na un negoshi i pèrdè tempu sinta warda nan turno pa entre otro hasi pago na e kompania. Pero no ta tur hende ta hasi uso di e sistema fásil aki òf tuma nan tempu pa siña hasi esaki. Pues e aglomerashon di hende na e sitionan ariba menshoná, práktikamente ta innesesariamente. Di e forma aki no ta kumpli ku e regla pa tene por lo ménos 1 meter i mei for di otro.     

Share This
error: Content is protected !!