KRALENDIJK – Djaweps 30 di aprel diputado James Kroon na nòmber di gobièrnu di Boneiru a dirigí palabra pa komunidat di Boneiru relashoná ku e dia liber pa selebrá ‘Dia di Rincon’. A selebrá e dia den tur trankilidat debí na e problema di ‘corona virus’. ”Mi ta gradisí obispu kende a duna outorisashon pa por a hasi e Santu Sakrifisio di misa awe. Danki ta bai spesial na gezaghèber di Boneiru Edison Rijna pa a aseptá pa organisá misa den un grupo chikitu. Awe mi ke trese dilanti i debí ku hopi hende no por ta presente, pa e regla relashoná ku e ‘corona virus’, a opta pa mi persona ta presente, komo representante di gobièrnu di e isla. Gobièrnu ta felisitá habitantenan di bario Rincon. E situashon aktual ta pone ku nos poulatinamente tin ku kuminsá bai bèk manera tabata e kaso den pasado. Huntu nos por kana i yega na deseonan.

Awe ta un dia ofisial liber di trabou relashoná ku selebrashon Dia di Rincon. Gobièrnu a tuma desishon resientemente, pa desaroyá Rincon, mirando ku aki 7 aña Rincon ta selebrá 500 aña di e bario. Ta bai atendé den diferente área pa loke ta trata infrastruktura di e bario. Ta notabel hopi hende ta bai biba pafó di e bario, kisas debí na falta di sierto kos. Entre otro ta bai krea sitio pa muchanan por rekreá. Pronto por tuma nota di trabounan ku ta bai kuminsá den e bario. Mantené distansha sosial i tene boso mes ta tur regla pa pronto gezaghèber por kuminsá suavisá e medidanan pa komunidat. Gosa na midi pa evitá tur problema,”entre otro diputado Kroon a menshoná.

Share This
error: Content is protected !!