KRALENDIJK – Gezaghèber di Boneiru Edison Rijna dia 1 di mei dia di labor a dirigí palabra na komunidat. El a inisiá su spich bisando: “Dia di labor ta un okashon speshal ku nos ta duna honor na tur hende ku diariamente ta kontribuí na nos ekonomia i desaroyo di nos isla dor di presta labor. Awe mi ke para ketu i duna èkstra agradesimentu na e esfuerso grandi ku trahadónan di vários sektor a i ainda ta hasiendo pa mantené nos pueblo seif di e pandemia di ‘corona virus’. Tata i mamanan di famia ku a sakrifiká nan kas, lagando famia atras pa ora i dianan largu. No solamente empleadonan di sektor médiko, sinembargo tambe otro sektornan i empleadonan públiko. Mi no ke bai menshoná tur pa mi no lubidá niun, sinembargo kada un di boso sa kon duru boso a i ainda ta traha pa nos komunidat den e krísis aktual. Di kurason i na nòmber di henter pueblo di Boneiru mi ke yama boso danki, hopi danki.

E sifranan pa loke ta trata ‘COVID-19’ te ku 1 di mei ta ku 247 persona a tèst, i no tin niun kaso aktivo di e vírùs di ‘Corona’ na kos isla. E promé grupo di repatriante ku tabata den karentena sentral por a bai kas. Mi ke gradisí nan pa e koperashon, komportashon i pasenshi.

Djamars 5 i djaweps 7 di mei lo bolbe tin e ‘Covid Drive Thru’ pa sigui tèst mas hende. Un yamada ta bai na tur esnan kende ta kere nan por tin síntoma relashoná ku e vírùs di ‘corona’ pa traha un sita pa hasi e tèst.

Riba 29 di aprel hues a duna su veredikto riba e huisio sumario ku repatriantenan den eksterior a entamá kontra gobièrnu tokante nan repatriashon. E hues a deklará nan demandanan no atmisibel. Ta studiando e posibilidat pa trese e gruponan bek mas lihé tras di otro manera hues a duna den su veredikto.

Riba konseho di e tim di repatriashon un grupo di 20 residente di Boneiru a yega for di Colombia i 4 for di Kòrsou. Tur 24 ta bai den karentena sentral.

Un otro punto ku mi kier a para ketu ne ta ku dia 30 di aprel den oranan di atardi KPCN i departamentu di Supervishon i mantenshon mester a sera e kaya di bai i bin for di Rincon, pasobra tabatin hopi hende ta trafiká riba e ruta. Un akshon ku kisas algun persona no ta di akuerdo, sinembargo tabata nesesario i na su lugá. Mi sa ku nos ke selebrá sinembargo kòrda ku siguridat di nos ta na promé lugá.

Mi por anunsiá ku entrante 6 di mei ta bai suavisá algun medida di emergensia ku a tuma. Ta trata di entre otro e posibilidat pa praktiká deporte i hasi ehersisio i tambe skolnan ku ta habri bèk dia 11 di mei, sinembargo ku algun regla. Mi konseheronan hurídiko ta hasiendo e preparashonnan nesesario pa adaptá e ordenansa di lei di emergensia den kuadro di e medidanan ku ta bai suavisá.

Ta importante pa nos keda realístiko, e vírus a yega Boneiru kaba i nos a sa di mantené e kantidat di hende infektá na solamente dos. Tene kuenta ku no por ekskluí e posibilidat ku na momentu ku poulatinamente suavisá e medidanan di emergensia, ku e vírus por bolbe presentá na Boneiru. Ta lógiko si esei sosodé kada un di nos mester ta konsiente ku e por tin komo konsekuensia ku ta bolbe insentivá medidanan di emergensia pa evitá ku e vírus por sigui plama.

P’esei, komo gezaghebber mi ke hasi un apelashon atrobe riba kada siudadano di nos isla pa nos sigui mantené nos mes na e reglanan ku ta vigente te djaluna awor i tene nos mes na e reglanan adaptá ku ta drenta na vigor. Di e manera aki kada un di nos ta aportá di forma individual pa poulatinamente nos bai bek na e bida ku nos a kustumbrá kuné ku sierto adaptashon. Laga nos demostrá di ta hende ehemplar. Sigui kuida bo mes, bo famia i nos dushi isla. Huntu kontra ‘corona’, gezaghèber Rijna a menshoná.

Share This
error: Content is protected !!