KRALENDIJK – Djabièrnè último gezaghèber interino Curvin George a menshoná e medidanan aktual relashoná ku e pandemia di ‘corona virus’ ku ta bai suavisá entrante 6 di mei binidero.

“Apesar ku ta bai suavisá e medidanan di emergensia entrante 6 di mei, skolnan, akohida despues di skol i krèsh ta habri bèk for di 11 di mei. Skol básiko i sekundario e regla di distansia sosial no ta konta pa e muchanan, pa adulto si. Mester kumpli ku e regla di no por tin mas ku 50 mucha huntu i ta bin aserka reglanan estrikto di higiena. Ta bai duna hopi informashon na skolnan pa asina mucha maestro i dosentenan sa kon pa tene nan mes i otro seif. E ámtenar di enseñansa obligatorio ta duna e instansianan aki e espasio te ku 24 di mei pa nan hasi e preparashon i tuma e medidanan nesesario pa por kumpli ku e reglanan aki. E palabrashon ta pa skolnan di forma kreativo kumpli e reglanan stipulá.

Pa edukashon pa adulto si ta apliká e regla di distansia sosial. Ta apliká e regla di no mas ku 50 hende huntu i regla estrikto di higiena.

Aktividatnan di deporte kaminda ku mester mantené distansia sosial i no mas ku 50 hende huntu ta posibel atrobe entrante 6 di mei. Ehèmpel di esaki ta ‘fitness’ i ‘gym’ i entrenamentu di kualke deporte kaminda por mantené distansia sosial manera tènis i windsurf. Tin eksepshon pa muchanan di 0 pa 17 aña. Nan si por práktika deporte ku kontakto, sinembargo ku regla estrikto di higiena i ku presensia mínimo di adulto. Adultonan si mester tene distansia sosial. Aktividatnan di kompetensia di deporte kaminda tin hende ta bin wak e kompetensia si ta prohibí te próksimo aviso.

Tambe entrante 6 di mei, gruponan por bai laman i bai kamper na laman manteniendo distansia sosial i no mas ku 50 persona huntu.

Por tin servisio religioso entrante 6 di mei manteniendo distansia sosial i no mas ku 50 hende na un sitio.

Pisina pa duna lès di landamentu, por habri bou di reglanan estrikto di higiena, manteniendo distansia sosial i no mas ku 50 hende entrante 6 di mei.

Restorant i otro establesimentunan di hóreka por sigui ta habrí solamente si kuenta ku distansia sosial i máksimo 50 persona na e lokalidat.

Kasino por habri bou di reglanan estrikto di higiena, manteniendo distansia sosial i no mas ku 50 hende entrante 6 di mei.

Organisashon di evenemento di mas ku 50 hende ta prohibí te próksimo aviso.

Tene kuenta ku e reglanan vigente ta keda válido te ku djamars awor 5 di mei 11:59 di anochi i inkumplimentu di esaki por tin konsekuensia. Departamento di mantenshon i supervishon den koperashon ku KPCN i Kmar ta sigui kontrolá i kaminda ta nesesario tuma e medidanan nesesario.

Por suavisá e medidanan di emergensia entrante 6 di mei solamente si kada un di nos keda tene nos mes na e reglanan vigente.

Tur otro regla stipulá den e ordenansa di emergensia ta keda vigente te ku un próksimo aviso,”George a finalisá bisando.

Share This
error: Content is protected !!