KRALENDIJK – 2 di mei 1970 tabata un fecha difísil pa famia Abraham, fecha ku e avion di e kompania ALM a ‘ditch’ riba laman. 50 aña pasá e avion di e kompania Antillean Airlines Flight ku number di buelo 980 a baha riba laman dilanti kosta di St Croix. Riba e avion ku 63 hende abordo entre otro tabata tin Margareth Abraham di 24 aña di edat komo stewardess. Hendrik de Windt a krea espasio pa un programa dediká na e dama yu di Kòrsou, kende 50 aña pasá komo stewardess a fayesé ehersiendo su trabou.

Radio Live 99.9 FM a haña interesante pa skirbi algu tokante e programa ku a pasa na televishon. A entrevistá un steward, kende tabata huntu ku defuntu Margareth riba e buelo, ku a konta un parti di loke a sosodé e mèrdia ku e avion di ALM. “Debí ku un kolega tabata sufri di kebrante di salú, Margareth kende ya a tuma retiro for di e kompania, a opta pa hasi un buelo mas, komo último, promé e i su enamorado Robby Schouten biaha pa Europa i kontraé matrimonio. E avion a sali for di New York pa bai Sint Maarten i regresá New York. Debí na problema ku mal tempu, e avion no por a aterisá na Sint Maarten. A haña señal pa bai Virgen Island ku tabata mas serka mirando ku e avion no tabatin hopi fuel,” e kolega steward a konta. El a sigui bisa: ”El a yuda algun persona pa sali for di e avion momentu ku el a baha riba laman, pa despues e sigui pa yuda e hendenan pafó di avion. E avion a baha na awa 3:49 di atardi ora lokal ku tabata 4 ora i 34 minüt di buelo. For di momentu ku e avion a aterisá riba laman, no a mira Margareth mas. Ta sospechá ku debí na e impakto fuerte di e avion riba laman, algu grave a sosodé ku Margareth”. E pilotonan a hasi varios intento pa por baha na e aeropuerto na Sint Maarten pero no a logra mirando ku tabatin mal tempu. Den nan lastu intento, e avion su kombustibel a kaba i nan a haña nan forsá ta baha riba awa. Esaki tabata 48 kilometer for di e isla St. Croix. Resultado di e investigashon ta ku e piloto a hasi un mal kalkulashon di kuantu fuel e tabata tin. Tambe e proseduranan pa ku seguridat no a wordu kumpli konforme reglanan. Lastimamente 23 persona a pèrdè nan bida inkluiendo Margareth.

Un ruman di Margareth a konta ku e mes un mèrdia ku e avion ku su ruman Margareth a ‘ditch’, e tabata hasiendo kompra pa e ruman, relashoná ku e kasamentu. “Mi ruman Margareth a pidimi pa kumpra pakinan chikitu pa hinka bolo pretu den dje na Venezuela, i mi a kumpli ku su petishon. E tempu aya 50 aña pasá, no tabatin telefon selular. Momentu ku e suseso lamentabel a sosodé ku mi ruman, mi tabata den tienda kumprando loke el a pidimi. 2 dia despues koriendo den un taksi di un sitio pa un otro lugá, un turista sin ku e sa ku ami ta ruman di Margareth, kende tabata pèrdí den e avion ku a kai, a konta loke a sosodé. Di e manera aki mi a tende ku un avion a kai i entre otro a pèrdè un stewardess. Di e manera aki e notisia a yega serka mi. Despues mi a tende di mi hendenan di kas ku nan a purba drenta den kontakto, sinembargo no a logra pa a informámi loke a sosodé,” e ruman a konta.

Robby Schouten

Robby Schouten a papia pa medio di telefon i el a menshoná i pidi pa pone flor na su nòmber, e sitio na aeropuerto ku ta karga nòmber di Margareth Abraham. Schouten e tempu ei tabata namorado di Margareth i nan tabata planiá pa drenta bida matrimonial. Schouten: ”Mi deseo tabata pa mi mes tei, sinembargo debí na e pandemia di ‘corona virus’, mi no ta presente na Kòrsou. Margareth un tremendo persona. Nos a prepará pa kasa i ya a kumpra renchi di kasamentu i diferente kos mas pa e boda tuma lugá. Mi a pidi Margareth pa stòp di traha komo stewardess i tur kos tabata plania kla pa nos biaha pa Europa. A pidi Margareth pa e hasi un buelo mas ku e kompania ALM, apesar ku el a tuma retiru. No tabata mi deseo pa e bai, sinembargo el a bisami e hendenan a trat’é nechi durante e 4 aña ku el a laborá, i e ta hasi e buelo pa e kompania. Di e manera aki el a bai i nunka mas a regresá,” Robby Schouten a konta. El a menshoná ku Margareth a regal’é un oloshi di man, i dia e tabata bai hasi e buelo, momentu ku nos a yega èrport pa e bah’é, el a bisami ku el a lubidá su oloshi i mi a kita esun ku el a regalámi, i bis’é bai ku esaki, Robby a konta.

Un subrino, kende ta yu di e ruman ohochi di Margareth a konta ku e famia ta sinti falta di Margareth, apesar ku 50 aña a pasa di loke a sosodé. El a menshoná ku despues di e temporada di pandemia di ‘corona virus’, ta duna atenshon na e sitio ku ta karga e nòmber: Plasa Margareth Abraham, na aeropuerto Hato, Willemstad Curaçao.  

Share This
error: Content is protected !!