KRALENDIJK—Algun dia pasa un suidadano konosí pa hopi hende na Boneiru Miguel Frans, a bai sosegá den brasa di Señor. Miguel segun por komprondé despues di hopi lucha pa su salú, a pasa pa un otro mundu, manera ta bisa. Fittipaldi a konta un parti di su amistat ku Miguel.”Nos a traha algun aña huntu na ‘Radio Nederland Werled Omroep’,(RNWO) kaminda Miguel tabata laborá e parti di seguridat pa SSS. Na ‘RNWO’ nos a sera amistat durante trabou. Un persona di karakter manera nan ta bisa. Nunka mi a tende òf mir’é aktua rabia òf papia di un tópiko ku e tabatin problema. El a kontami ku e i mi tata Richard Pietersz, kende ta su pareu, ku nan a bai skol i ta bon amigu. Mi a papia ku mi tata i el a kontami bèrdat nan a bai mes un skol i tabata bon amigu for di momentu nan tabata mucha chikitu. Mi tata a bisami ku e tempu aya e skol tabata patras kaminda ántes tabata San Bernardo School, dilanti di parokia San Bernardo. E tempu aya tabata yama e skol ‘Berwaarschool, loke despues a haña e nòmber ‘Kleuterschool’. E klasnan tabata di palu. Mi tata a kontami ku Miguel ta yam’é Pietersz ‘sz’ for di tempu nan tabata bai mes un skol. Motibu di esaki tabata ku un yùfrou a skirbi fam di mi tata sin pone ‘sz’ na final di e fam, i momentu mi tata a koregí e yùfrou, ei Miguel a kuminsá yam’é Pietresz ‘sz’, mi tata a kontami. Ami a bai skol huntu ku un yu di Miquel, Gregory, i nos tabata huntu den klas. Despues el a bai studia i biba den eksterior i nos a pèrdè kontakto. Nos tabata bon amigu. E tabatin karakter típiko di e tata. Mi sa mir’é na misa algun okashon huntu ku su yu.

Despues ku RNWO a stòp di eksistí na 2013,  nos a sigui mira i topa otro de bes enkuanto. E tabata un parokiano di La Bírgen di Coromoto, kaminda mi sa mir’é riba djadumingu huntu ku su famia. Miguel un persona ku atenshon i apresio pa hende i amabel. Mi sa ku e tabata sufri kebrante di salú, despues el a rekuperá i sigui ku un salú no stabil notabel, sinembargo sèmper apesar di esaki, e tabata ekspresá felisidat. Staf i personal di Radio Live 99.9 FM  ta deseá forsa pa e famia den e momentunan difísil awor, ku pèrdida di nan ser kerí. Dios lo duna forsa na famia i warda Miguel den su Reino.

Share This
error: Content is protected !!