KRALENDIJK – Diputado Nina den Heyer a papia tokante Skol i akohida pa mucha ku ta bai kuminsá otro siman djaluna 11 di mei 2020. “Dosentenan di skol ta prepará pa e komienso di skol den un ambiente nobo i diferente for di pasado, esta ku regla nobo. Ta bai atendé kon pa evitá aglomerashon di mayor na skol. Mucha ku ta sufri kebrante di salú no por bai skol. Mester keda kas i partisipá na e skol e motibu dikon e mucha no a bai skol. Lo tin èkstra atenshon pa e parti di higiena i tambe e pouzenan lo bai na un manera adaptá. Di parti di skol lo duna atenshon èkstra pa ku sintimentunan ku por biba serka e mucha tokante henter e situashon di Corona aki. Por tin prekupashon serka mayornan, sinembargo laga nos konfia ku skolnan sa kon atendé ku e situashon. E parti di akohida pa mucha a pidi pa mayornan sigui paga fin di luna. Esaki a sosodé promé ku a bin e ayudo for di Hulanda. Por a konstatá ku apesar ku krèshnan por a hasi petishon pe medidanan di alivio di SZW I EZK, tòg esaki no tabata sufisiente pa kubri nan gastunan. Komo gobièrnu a hasi e petishon pa por uza medionan di Best for kids pa duna sosten adishonal na e krèshnan pa asina kubri parti di e gastunan ku a keda apesar di e alivio di Gobièrnu di Reino. E siman aki ta kaba atendé un ke otro i krèshnan ta bai atendé ku esnan kende a paga kontribushon na e krèsh. Kòrda mantené nos mes na e reglanan di higiena, pasobra nos salú ta den nos mes man,” entre otro diputado den Heyer a menshoná.            

Share This
error: Content is protected !!