KRALENDIJK – Departamentu di Salubridat Públiko a lansa, huntu ku Fundashon Mariadal, e Drive-Thru di COVID riba 14 di aprel último. Meta di e COVID Drive-Thru ta pa tèst un kantidat mas grandi di persona. Dor di esaki por atkirí mas konosementu tokante e sirkulashon di e vírùs di corona na Boneiru.

Bentaha di COVID Drive-Thru

E bentaha di e COVID Drive-Thru ta ku por a provee un situashon di tèst seif i ku privasidat, kaminda hende por a mèldu nan mes dirèkt pa e tèst, tambe si tabatin kehonan leve di salú, segun Fundashon Mariadal.

Ta ehekutá e tèstnan riba petishon di dòkter di kas a base di un definishon di e kaso. E definishon di e kaso tabata: kentura i/òf tos i keho respiratorio den kombinashon ku un biahe pa un area di riesgo òf kontakto ku un pashènt di COVID-19.

Oportunidat pa tèst atrobe

Riba djamars 5 i djaweps 7 di mei atrobe e Covid Drive-Thru ta habrí. E orarionan pa tèst ta di 4or te 6or di atardi, solamente ku sita. Pa traha un sita por yama number di telefòn 715-8900 ext. 1528. Pa kada vehíkulo por tèst dos persona riba e vírùs di corona.

E tim di tèst di Fundashon Mariadal i e Departamentu di Salubridat Públiko ta satisfecho ku e método di trabou i e reakshon for di komunidat.

Share This
error: Content is protected !!