KRALENIJK – Señora Epifania Nepomuceno resientemente a bai landfill na Lagun i segun e ta konta, a prohibié pa subi tereno. “For di 2010 mi tin un karta ku tin skirbi ken mi ta, i ku mi tin pèrmit pa por saka heru bieu for di riba tereno di Landfill. Esaki por tuma lugá ku palabrashon pa paga un montante pa kada ton di metal ku e nos  bai kuné for di Landfill.  E karta ta mustra ku direktor di Selibon N.V. ta na altura di e palabrashon loke nos a firma na 2010,” Nepomuceno a konta Radio Live99.9 FM. El a sigui bisa:”Mi tin 4 aña ku mi no ta aktivo ku e kompania, sinembargo e otro hendenan si a kontinuá. Nan tarea ta pa saka material for di Landfill ku e meta pa resiklá. Simplemente mi tabata deseá pa subi tereno di Landfill pa tuma nota kon limpi i stabil e direktor ta atendé ku e sitio. E señora na entrada di Landfill a nenga redondamente pa permití pa ami subi tereno. El a tuma e karta i a saka potrèt di dje loke mi a bis’é no ta korekto. E por a pidimi promé ku e ta saka potrèt di un papel ku ta pèrtenesé na mi persona. E señora a tratami malu na momentu mi a presentá na e sitio. Apesar ku mi a splik’é bon kla, ku ta simplemente mi a bin pa wak kon e tereno ta awor despues di 4 aña . Mi a komprondé ku e lugá ta bon organisá pa atendé ku shushi. Mi ta patrosinadó di e proyekto di awe di resiklahe. Na Boneiru nan no tabata konosé resiklahe18 aña pasa. Awor ta 18 aña ku mi a siña e hendenan di Boneiru kiko ta resiklahe. Mi a traha un kas ku solamente material di landfill, sin paga niun sèn pretu pa trah’é. Loke a sosodé a desapuntámi hopi. Mi tin un dokumentu ku ta pèrmitími pa subi e tereno ku 3 persona mas, i hasi loke tin palabrá. Pues mi ta outorisá pa por subi tereno di Landfill,” Nepomuceno a menshoná.

Radio Live 99.9 FM a drenta den kontakto ku Selibon N.V. i nan a reakshoná lo siguiente. “Bèrdat e señora a presentá na entrada di landfill ku e karta, i el a menshoná ku e ta bin pa saka material loke e tin pèrmit pa hasi. E persona na entrada di Landfill a bis’é ku no por lag’é drenta pa saka nada for di riba tereno, i e mester bai serka e direktor di Selibon pa por atendé. E señora a rabia i a ekspresá su mal kontentu i no ke a bai serka e direktor. E karta ku e tin ta fechá di 2010 i mientrastantu tin diferente kambio i mester atendé loke a palabrá na 2010 di nobo. Selibon ta deseá pa sinta ku señora Nepomuceno, pa palabrá kon por kontinuá. Aktualmente tin otro kompania ta hasi e tarea di bai ku material pa resiklahe for di landfill, pues mester atendé un forma nobo pa bai ku material for di landfill, gerente di Selibon N.V. a bisa Radio Live 99.9 FM, relashoná ku loke a sosodé resientemente.

Share This
error: Content is protected !!