KRALENDIJK – Entrante 4 di mei FORMA a habri un lokèt di informashon ‘Puntra pa bo sa’. Esaki ta un servisio kaminda e siudadano por yama, what’s app òf pasa personalmente (Playa i Rincon) pa hasi su pregunta relatá ku servisionan i informashon relatá na e situashon di krísis kousa pa e vírus COVID-19, asina yama Corona Virus.

Den e periodo di aki tin hopi informashon ta sali tur kaminda, via sosial media, televishon i korant. Den diferente video, tambe hopi informashon skibí. Instansianan ta indiká via websites unda mester registrá etc.

No ta tur adulto tin akseso na internèt òf e-mail, pues ta bira difísil pa e adulto ei por registrá pa yudansa òf pa informashon. E informashon ta hopi biaha kompliká difísil pa komprondé. Tambe ta difísil si bo no por lesa i skibi sufisiente pa saka afó kiko ta notisia fake i kiko ta importante di tur e informashon. Esaki ta pone ku e analfabeto no tin akseso na tur informashon balioso i por krea insiguridat i (mas) strès serka e adulto.

E meta di e servisio ‘Puntra pa bo sa’ ta pa:

· duna sosten den haña klaridat riba pregunta ku kliente tin i pa e kliente haña informashon unda e mester ta pa yudansa. Pregunta por ta amplio relatá na sosten finansiero, relatá na salú físiko i mental, COVID -19 etc.

· Registrá kliente pa sosten finansiero pa hür, internèt, WEB, banko di kuminda (Yudami)

· Tuma pasonan pa kliente registrá pa yudansa ku e mester na e instansia konserní.

· Pa e kliente por registrá òf haña kontakto ku e instansia konserní mesora, riba mesun dia (dentro di 3 dia di trabou).

Bo tin pregunta òf sa di un hende ku mester yudansa bo por yama pa ‘Puntra pa bo sa’ por yama tur dia djaluna-djabièrnè entre 8:00-17:00 na number di telefòn 7857314, tambe por manda what’s app.

Por pasa tambe personalmente, tur djaluna di 11:00-14:00 na FORMA. Tur djabièrnè di 11:00-14:00 na Rincon, ofisina di Entidat Públiko (OLB).

Pa e servisio na Rincon i Playa, FORMA ta sòru pa kumpli ku reglanan segun medidanan stipulá:

· ta evitá tambe ku muchu hende ta akudí pareu, pa esaki ta parti number riba e dia. Si akudí mas hende ta traha un sita nobo.

· ta mantené 1.5 meter di distansia

· medidanan di higiena manera laba man promé ku haña servisio.

Share This
error: Content is protected !!