KRALENDIJK – Direktora di Skol Amplio Papa Cornes Patrisia Angela, a papia ku Radio Live 99.9 FM i a menshoná ku djaluna 11 di mei skol ta kontinuá parsialmente i si tur kos kana bon, 18 di mei skol ta sigui pa tur mucha pareu. Esaki ta debí na e trabounan di drechamentu di kaya den e área di skol. “Kaya Leiden, e kaya prinsipal ku ta bai na e skol, ta keda será pa un temporada. Esaki ta e kaya ku ta yega e skol via kaya Amsterdam. E kaya ta keda será i mas ku 500 hende mester bai e skol. Tur  tin ku pasa di otro kaminda pa yega e skol. Solamente un kaya tin aktualmente pa por bai na e skol.

Pues pa evitá aglomerashon a opta pa dividí e klasnan ku ta kuminsá. A implementá un asina yamá plan ‘B’, ku ta sigui di e forma aki. No ta tur mucha ta kuminsá skol djaluna awor. A parti e alumnonan den grupo ‘C’ i ‘D’ i muchanan ku ta ruman ta bin skol riba e mes un dia. A manda karta pa informá mayor na kas. Pues nos a hasi diferente kos pa skol kuminsá djaluna 11 di mei den un forma modifiká debí na e situashon di kaya. Personal di DRO i BWM a bin ku e opshon pa traha un kaya nobo pa krea mas espasio di trafikashon. Nan a kuminsá ku e trabou pa habri un kaya adishonal temporal. Dia skol kuminsá otro siman, nos ta ahustá e plan pa kuminsá ku tur mucha dia 18 di mei. Diferente mayor a bai DRO pa splika tokante e problema, esta ku e situashon di kaya no ta stabil. Por komprondé ku debí ku a sera aeropuerto, a pone ku trabou a stanka pa loke ta drechamentu di  kayanan den e área di skol. Diferente hende mester a bin for di eksterior pa traha, sinembargo no por a yega Boneiru,”e direktora di skol a menshoná.

El a finalisá bisando: ” Debi na e situashon di Covid-19 ku ta keda unu di atenshon, mayor lo no por aserka un yùfrou di skol. E mester komuniká ku e yùfrou pa medio di telefon pa traha un sita. Un súplika ta bai pa mayornan, tene pasenshi i kore poko poko i responsabel den e área di skol pa evitá kualke suseso innesesariamente,” direktora di skol yùfrou Patrisia a menshoná.

Share This
error: Content is protected !!