KRALENDIJK – Den e situashon aktual di medidanan pa atendé ku e vírùs COVID-19, Sentro Hubentut i Famia (Shif) ta konsiente di e posibel efektonan ku esakinan tin riba subida di violensia doméstiko i relashonal, maltrato, abusu o negligensha di mucha. Pa e motibunan aki SHIF a skohe pa, huntu ku gobiernu di Boneiru i otro partnernan den vèlt sosial, bini ku programa informativo pa informá, sostené i eduká komunidat. Banda di esaki SHIF ta introdusí un liña telefóniko di yudansa na distansia pa komunidat.

Na mei, yüni i yüli lo por mira na televishon, skucha na radio i topa riba plataformanan sosial diferente pelíkula kòrtiku ku mensahe, konseho i teps pa apliká den situashonnan familiar ku lo por presentá. Ta trata di 12 pelíkula ku kontenido riba área di maneho práktiko di kas, demanda emoshonal haltu, sosten na mayornan den edukashon di yu, uso di ret sosial i maneho di entrada.

Pa mucha i hoben lo tin, durante e lunanan menshoná, un serie di 12 programa edukativo i rekreativo na Dutch Caribbean T.V. E intenshon di e programanan akí ta pa eduká i entretené nos muchanan, huntu ku diferente artista i spesialista.

Banda di esaki lo tin shete programa kaminda, den koperashon ku partnernan sosial, lo brinda esnan den nesesidat informashon ofishal i konfiabel.

Instansia sosial lo duna splikashon kon ta sigui ofresé servisio na komunidat den e periodo di Covid 19.

For di dia 1 mei SHIF a kuminsá ku liña di telefòn pa duna sosten na komunidat. Esaki komo ku tin servisio ku a kai afó parsialmente. Ku e liña di sosten akí Shif kier kontinuá su servisio na komunidat na distansia.

SHIF su meta prinsipal ta pa promové un aktitut preventivo pa evitá o minimalisá eskalashon di kualke tipo di agreshon i/o negligensia i/o abuso relashonal. Huntu ku esaki lo stimulá i provoká uso kreativo di formanan pa atendé ku mucha(nan) i tiner.

Tur persona por usa e liña pa pidi informashon, konseho o sosten na distansia. Lo atendé e asuntu dirèkt, kaminda esaki ta kuadra ku trabou di SHIF i referí na otro instanshanan kaminda esaki ta kai bou di nan tarea.

Pa kualke problema personal o relashonal i/of nesesidat di sosten den edukashon di bo yu(nan) bèl 701 5257. E liña ta funshoná di djaluna pa djabièrne di 9 pa 4 pm. Tin posibilidat pa manda app o hasi app call tambe riba e mesun number.

Share This
error: Content is protected !!