KRALENDIJK – Djabièrnè nèt promé ku mei anochi, a sosodé un aksidente di tráfiko na altura di Palu Blanku riba kamind’i Yato Bako. Un outo di famia ku un okupante te ahinda pa motibu nan deskonosí biniendo for di kaya Macario Cai St Jago pa subi kamind’i Yato Bako, a sigui kore stret i aksidentá kontra kurá di un kas. E hòmber shofùr despues di e impakto tabata kehá di doló i a transporté ku ambulans pa hòspital. E vehíkulo a keda tras ku basta daño material mirando e impakto fuerte kontra kurá di e kas.

Habitantenan di e kas enkuestion tabata basta indigná mirando ku pa di tantisimo bes outo ta dal kontra kurá di nan kas. Mester kana un kaminda di krus pa por drecha nan kurá bèk. A aserka gobièrnu i e departamentu konserní varios biaha pa buska solushon pa e situashon dor di por ehèmpel pone mas drèmpel riba kaya Macario Cai St Jago pa baha velosidat haltu ku outonan ta kore riba e kaya aki. Segun doño di e kas, nunka nan por drumi trankil komo ku sèmper outo ta dal den nan kurá i ta teme ku un dia outo por dal i drenta te den nan kas. Un bes mas ta pidi esnan konserní pa hasi algu mas lihé posibel pa evitá lo peor.

Share This
error: Content is protected !!