KRALENDIJK – Wouter Koolmees, minister di asuntunan sosial i di labor den e programa na televishon djabièrnè último “Op 1” a deklará.: “ Kompanianan ku via e areglo di NOW a pidi supsidio di salario pa por sigui paga nan trahadónan, entrante yüni por retirá nan empleadonan.

Esaki ta un medida ku Ulanda Oropeo a tuma.

Na Boneiru e areglo di NOW ta bálido te ku 13 di yuni 2020 i ta un areglo spesial trahá pa ku e situashon di nos isla komo konsekuensia ku a sera Boneiru pa evitá e plamamentu di e virus di corona, konosí komo Covid-19.

E notisia aki a lanta hopi preokupashon serka USIBO. Manera ta konosí e “NOW-regeling” aki ta konta pa nos tambe te ku 13 di yüni 2020. Ela yuda ku por a mantené un gran kantidat di trahadó na trabou i evitá un kalamidat sosial. Nos sa ku for di seno di Diálogó Sentral lo sali un petishon pa alargá e areglo aki minimal te fin di 2020. Sinembargo Nos no tin ningun garantia ku Ulanda lo akordá e petishon aki. Pues nos mester sali for di e realidat di ku 13 di yüni awor. e areglo lo terminá. Esei lo nifiká ku retironan por kuminsá kai. Aki nos no konosé un areglo di desempleo(ww-uitkering). Pues esnan ku haña retiro lo bai kai den ” onderstant ” kual montante no ta uno di kanta makamba si nos realisá ku e minimo sosial awor aki pa un soltero ta Usd 951 pa luna. Ademas lo mester tene kuenta ku no ta tur trahadó lo bin na remarke pa ònderstant, ya ku ta tene kuenta ku entrada di pareha. Pues un situashon serio i di atenshon

USIBO ta hasi un yamada na e sindikatonan miembro pa kuminsá sondea kiko lo nifiká si e medida aki stòp13 di yüni awor pa kuponan di trabou na e diferente kompanianan ku ta organisá den un sindikato i ku a hasi uzo di e areglo aki. USIBO di su parti lo bai na inventarisá kiko e situashon aki lo ta pa e merkado laboral den su totalidat.

En todo kaso mester kuminsá pensa kiko lo por hasi pa mantené mas kupo di trabou posibel. Lo mester pensa kreativamente. Nos no por drumi warda 13 di yüni yega pa e ora ei bai kuminsá pensa kiko tin ku hasi. E promé akshon di USIBO lo ta di manda un karta di urgensia pa e Plataforma di Diálogo Sentral kaminda nos ta eksponé e situashon aki pa e keda tratá.

Vishon USIBO pa despues ku habri.

Ta importante pa nos desaroyá un vishon, un pensamentu pa e situashon ku lo bai tin despues ku habri bèk. Opviamente e preokupashon mayó ta I lo ta kon ta start e motor ekonómiko bèk i kon ta limitá e daño na e mínimo. USIBO kier a trese e siguiente komparashon. Ekonomia ta pa nos manera un garoshi ku ta karga nos desaroyo sosial ekonómiko, esta ta e garoshi ku den dje tin prosperidat i bienestar di nos pueblo. Miéntras ku e prosperidat ta para pa e adelanto material, bienestar ta esun ku ta determiná e kalidat di bida di nos hendenan.

Pa nos alkansá e desaroyo sosial ekonómiko duradero i balansá(esta un repartishon husto di nos entradanan), USIBO ta mira un koperashon estrecho, habrí i transparente entre tres forsa. Nan ta Gobièrno, Organisashon di Empresarionan i Organisashon di Trahadónan.

Gobièrnu.

E ròl di gobièrnu ta pa prepará e kaminda riba kua e garoshi tin ku kore suave. Insentivanan fiskal, eliminashon di burokrasia, servisio optimal, akuerdonan ku otro merkadonan, lei- i reglanan pa organisá nos komunidat ets. Ku e kaminda bon drechá i ku kontinuamente ta mantené e kaminda den un estado optimal, ta hasi posibel pa e otro dos forsanan por funshoná.optimal.

Organisashon di Empresarionan.

Esakinan ta e haladónan di e garoshi. Mirando ku e kaminda ta bon drechá i ku un bon plan di mantenshon, nan ta inverti i ta dispuesto di kore riesgo pa kuminsá tur klase di negoshi ku ta kuadra den e maneho ku gobièrno stipulá. Ta den e konteksto aki nos di USIBO ta sostené nan den e pensamentu ku nan a desaroyá pa bin ku medidanan adishonal pa en todo kaso mantené e negoshonan bibu i krea un perspektiva positivo pa e negoshinan por sigui drei I asina mantené e kuponan di trabou. Pues nan a hasi petishon pa medidanan adishonal pa e garoshi no kibra.

Organisashon di Trahadónan

Trahadónan i nan organisashon sindikal ta e pushadónan di e garoshi. Nan ta e motor di e outo. Nan ta e perkurá pa produkshon. Pues nan ròl ta sumamente importante den e desaroyo nobo ku nos ta bai enfrentá. Pa tal rason USIBO a lansa dos idea, uno ta pa bin ku un instituto finansiero propio ku ta bai karga e desaroyo. Fondonan den e instituto ei lo mester bin di nos fondonan di penshun, nos kompanianan di aseguro, nos bankonan, nos gobièrnonan, di fondonan internashonal(Fondo di krisis di Oropa, Fondo di Banko di Desaroyo di Ulanda, Fondo di Banko Mundial), pero tambe di fondonan prosedente di repartishon di bienes ora a disolvé Antia i no na e delaster lugá fondonan for di nos organisashonnan di empresarionan i di trahadónan. E fundeshi pa lanta e insituto aki a keda poné na 1997 ku un estudio di fakibilidat i un desishon di 2014 pa lanta e instituto efektivamente.

E di dos idea ku USIBO a lansa ta pa nos uza e tempunan benidero pa re-eduká e merkado laboral. Kosnan lo bai kambia sigur, teknologia lo drenta na gran eskala, mundo di IT lo ta importante, lo bai robotisá nosmerkado laboral. E preshon riba nos sitema di seguridat sosial lo oumentá .Pa tal rason nos mester kuminsá na re-eduká i reformá nos forma di traha. Invershon den esaki lo duna máksimo rendimentu na e desaroyo sosial ekonómiko.

Finalmente USIBO kier trese dilanti ku pa e vishon aki haña un oportunidat real i sinsero pa bira un éksito e ta rekerí un “mindset” nobo ku por sierto e COVID 19 pa malu ku e por tabata i ta pa nos salubridat ela siña nos un kos ku hamas nos por lubidá, esta pa nos sobrebibí nos mester praktiká SOLIDARISMO. Nos mester kita for di e idea I pensmaneu individualista di Ami pa ami i Dios pa sobrá. Na Ulandes Ikke ikke en de rest mag stikken,

SOLIDARISMO ta: E konsiensia ku apesar ku indivduonan tin diferente tarea, diferente interes, diferente balornan, òrdu i koherensia di un komunidat ta dependé di por konfia otro pa ehekutá sierto tareanan spesífiko. Esaki ta enserá ku individuonan ta realisá ku defendé o yuda interesnan di otro al final ta na interes di e individuo mes. Na nos pareser ta asina aki so nos lo por enfrentá e normal nobo despues di e krisis aki.

Pregunta ta: NOS TA KLA MENTALMENTE PA BAN ENFRENTA E RETO AKI ?

Share This
error: Content is protected !!