KRALENDIJK – 12 di mei ta e fecha kaminda ta duna atenshon spesial na enfermeranan mundialmente. Apesar di e situashon aktual, relashoná ku e pandemia di ‘corona virus’ ta bon pa para un momentu ketu i duna atenshon, na esnan kende tin un tarea ku hopi responsabilidat pa yuda e ser humano pa e kontinuá ku bida. Hopi enfermera awe no tin un momentu pa nan por selebrá huntu ku otronan, miéntras nan ta duna atenshon na e hende drumi riba kama, kisas den un situashon kritiko. Direktor di Fundashon Mariadal Dr. Giovanni Frans a menshoná riba e dia di awe ku e retonan ku e “covid-19 a trese kuné, no ta un kareda di 100 meter di ‘sprint’, sino un máratòn. Ta hopi importante pèrkurá bon pa boso salu pa boso ta stabil ku forsa pa yuda esnan den nesesidat di boso atenshon, el a bisa.

Durante programa na Radio Live 99.9 FM, 2 persona di Fundashon Mariadal a splika tambe ku ta hopi trabou tin i esaki ta pone ku e hende ta mas krepchi, i ta situashon pa dil kuné. Ta trata di Giselle Coffie i Nanine Ponson. Nan a menshoná entre otro ku Boneiru su hospital a funshoná ku ménos personal un temporada, mirando ku esnan ku mester a bin for di Hulanda no por a yega Boneiru debí na e problemanan relashoná ku ‘corona virus’ entre otro na Hulanda mes. Awe mester tabatin un selebrashon ofisial, sinembargo a kanselá esaki i a hasi algu mas digital pa e personal. Sigur a hasi algu pa e enfermeranan, kaminda nan a risibí algu pa pasa boka manera ta bisa i un tremendo lùnch mèrdia. E aña aki aparte di e selebrashon di tur aña ‘Florence Nightingale award’, a wordu hasi di tal forma ku tur hende ta risibí e premio. Tur enfermera a duna tur ku tin pa yuda e hende ku ta den nesesidat aktualmente. A traha un video clip ku empleadonan di Fundashon Maridal i a estrená esaki na Radio Live 99.9 FM awe mainta.

Share This
error: Content is protected !!