KOLEGIO KRISTU BON WARDADOR PARTÍ DEN 2 PA TRABOU DI RENOBASHON

Written by on

KRALENDIJK – Direktora di Kolegio Kristu Bon Wardador Carine Thielman den un entrevista ku Radio Live 99.9 FM, a menshoná ku promé dia di skol a bai bon, awor e muchanan di e skol ta partí den 2 grupo. Thielman: ”Tur kos a kana bon manera nos a prepará pe, na yegada di e muchanan mainta e promé dia di skol, na Antriol kaminda ántes tabata ‘Papa Cornes School’. A pidi pa mayornan no subi tereno di skol i tur hende a kumpli pa tur kos a kana na òrdu. Mèrdia momentu ku skol tèrminá tabata poko drùk, momentu ku tur mayor ta bin buska muchanan na mes momentu. Nos a parti e klasnan den grupo, pa evitá ku tur mucha ta sali na mes momentu pa bai kas for di den klas. Awor nos tin ku atendé ku e muchanan na skol ku medidanan nobo manera entre otro laba man ku regularidat i mester limpia mesa. Mester habri bentana i porta un òf mas bia pa dia pa sirkulashon di bientu. Meskos ta e kaso ku e muchanan ku ta na Kolegio ‘Kristu Bon Wardador’ na Nikiboko, kendenan ta bou di guia di yùfrou Juraima Josefa-Bernabela. E skolnan tin ora pa tèrminá ku poko diferensia for di otro, pa evitá ku mester kore purá purá di un skol pa otro, esnan ku tin yu ku ta bai na tur 2 skol aktual,” Thielman a menshoná. Momentu ku muchanan ku ta na e skol na Antriol mester bai praktiká deporte ‘gem’, nan ta bai ku bus na ‘Kolegio Kristu Bon Wardador’ na Nikiboko unda tin un sala di deporte. E trabou pa renobá Kolegio ‘Kristu Bon Wardador’ ta dura mas o ménos un aña i mei. Awor ta bai kuminsa ku e renobashon di siklo 1. Ora esaki ta kla, lo sigui ku renobashon di e otro parti. Momentu ku e skol ta kla kompletu ku renobashon, entre otro tur klas ta bai disponé di aire kondishoná, meskos ku ta e kaso na otro skolnan, “Thielman a bisa.

Share This

Current track

Title

Artist

error: Content is protected !!