KRALENDIJK – Gezaghèber di Boneiru Edison Rijna un biaha mas durante un konferensia di prensa a dirigí palabra na komunidat. El a kuminsá na menshoná ku ta dia di enfermera i a gradisí nan pa e tremendo trabou, awor mas ku nunka. Rijna: ”Awe ta dia internashonal di enfermeria. Tur aña di nobo riba kumpleaño di ‘Florence Nightingale’ ta duna honor na esnan ku ta traha den sektor di kuido. Naturalmente meskos ku vários selebrashon i evenementu ku a tuma lugá den e simannan tras di lomba, selebrashon di dia internashonal di enfermeria di e aña aki, tin un toke diferente debi  di e impakto di ‘corona virus’.

Mi ke hasi uso di e oportunidat aki pa felisitá tur hende ku traha den sektor di kuido riba boso dia speshal. Sigui ku e bon trabou.

Pa loke ta trata e sifranan di awe, nos no tin niun kaso aktivo di ‘corona virus’. A tèst total 291 te ainda pa e vírùs, di kua 31 a tèst via di e ‘COVID drive thru’ siman pasá djamars i djaweps. Te ku awe tin 90 persona den karentena.

Awe di forma ofisial mi a risibí e grato notisia ku mi a keda nombra komo gezaghèber pa un periodo mas.

Pa  ami ta un gran plaser i honor pa sirbi mi pueblo komo boso gezaghèber. Di forma humilde mi ta gradesido pa e e konfiansa ku su mahestat Rei Willem Alexander i Ministerio di BZK ta pone den mi persona pa bolbe nombra mi komo gezaghèber pa e próksimo 6 aña.

Ku entusiasmo i determinashon mi ta komprometé mi mes pa hasi tur loke ta na mi alkanse pa sirbi mi isla mas mihó posibel.

Nos ta na komienso di un kapítulo nobo di nos historia mundial den tur sentido di palabra i mi ta orguyoso di por ta forma parti di e proseso komo boso sirbidó,’ gezaghèber Rijna a menshoná. 

Share This
error: Content is protected !!