KRALENDIJK – Ayera un biaha mas agentenan polisial tabatin kòntròl di tráfiko na vários parti di nos isla. Manera ta konosí for di promé di mart 2020 e lei di tráfiko nobo ta vigente.

Entre otro e reglanan nobo di tráfiko ku ta di suma importansia ta:

Obligashon pa manehadónan di skuter, motosaikel i “quad” bisti un hèlm.

Prohibishon momentu ku ta kore pa tene un telefòn selular òf “tablet” na man.

Obligashon pa bisti faha di siguridat den outo.

Obligashon pa transportá mucha bou di 4 aña patras den outo i den un stul di mucha.

Glas di outo mester laga 35 porshento di lus pasa.

A kontrolá vários vehíkulo kaminda polis a duna prosèsferbal pa kore entre otro sin hèlmu, glas di outo skur i pa kore sin reibeweis òf seguro bálido. A konstatá ku diferente shofùr ta hasi uzo di nan telefon selular den tráfiko, loke ta kontra lei di trafiko.

Remarkabel ta ku vários outo ta kore ku “tint” riba e glasnan di dilanti i ku un porsentahe prohibí. Tur esaki, apesar di e atvertensia i tur aviso ku nos lei nobo di tráfiko ta na vigor, for di 1 di mart 2020. Tur a risibí un prosèsverbal. Polis te ainda ta duna chèns pa traha un sita, pa pasa warda di polis i prueba ku a kita esaki. Si kita e “tint” e but ta keda kanselá.

A kontrolá un total di 25 outo di kua 6 a haña un prosèsverbal pa entre otro kore sin faha di seguridat, uzo di telefòn bou di stür, glas skur i kore sin seguro bálido

Polis ta sigui kontrolá manera kustumber riba e prohibishon pa kore bou di influensia di alkohòl. Polis ta sigui kontrolá si shofùrnan ta tene nan mes na e velosidat máksimo permití.

Share This
error: Content is protected !!