KRALENDIJK – Liseo Boneriano un di e 4 unidatnan ku ta forma parti di SGB ta buskando un direktor òf direktora nobo pa e skol. Pa promé di ougùstùs ta bai tin mester di un direktor nobo pa SGB sekshon Liseo Boneriano. Radio Live 99.9 FM a keda informá ku e direktor aktual di Liseo Boneriano a pasa pa un otro departamentu i pa e motibu aki ta buskando un direktor pa e unidat. SGB ta parti den 4 unidat :VMBO, MBO, Liseo i SLP. Kada un tin un direktor. Liseo Boneriano ta konsistí di MAVO, HAVO i VWO. Mas o ménos 45 kolega ta atendé ku algu mas di 500 mucha na e unidat, ku ta rekerí yudansa pa kontinuá. Pa e grupo aki ta buskando un direktor ku vishon i amor pa e muchanan. Ta rekerí pa esun ku ta interesá den e trabou pa e por dominá papiamentu òf ta deseá pa siña e idioma. E persona interesá por manda un kopia di su diplomanan mas tardá 24 di mei 2020. Por solisitá pa medio di https://werkenbij.sgbbonaire.info. Por tuma kontakto ku direktor general di SGB F.van Efferink, na number di telefon 715-7770 òf “e-mail” frans.van.efferink@sgbbonaire.com

Share This
error: Content is protected !!