KRALENDIJK – Direktor general di komunidat di skol Boneriano (SGB), sr Frans van Efferink a papia resientemente i splika di e situashon nobo, ku ta bai atendé ku hóbennan na skol, awor poko diferente for di pasado. Van Efferink: ”Meskos ku tur hende na Boneiru nos tambe ta poko asombrá ku muchanan no mester tene distansia sosial. Nos ta komprondé pasobra na Boneiru no tin e vírùs. Nos a opta pa muchanan haña lès den su totalidat e lastu temporada di aña eskolar. Awor tin èkstra atenshon pa loke ta trata e parti di limpiesa di e klasnan. Otro kos ku skol ta pèrkurá pe, pa na diferente sitio tin awa, habon i ‘hand sanitizer’ pa muchanan laba man ku regularidat. Nos a palabrá algun situashon ku nos mester tene nos mes n’e, i no ta bai pèrmití grupo di mas ku 50 studiante huntu na un sitio na skol. A hasi kambio na e momentu di pouze, pa evitá ku hopi mucha ta topa. Na Liseo Boneriano e ta poko mas difísil debí ku e tereno ta poko chikitu. Den klas no ta problema, sinembargo riba tereno pafó di klas mester a hasi diferente ahuste pa evitá ku hopi mucha ta topa. Ta hasi diferente ahuste pa logra mihó posibel pa loke ta trata distansia sosial. Na MBO tin ku bai pone bon atenshon debí ku mayoria hóben ta 18 aña òf di mas edat, i aki si mester tene distansia sosial” direktor di SGB van Efferink a bisa. 

Share This
error: Content is protected !!