KRALENDIJK – Un suidadano a konta un reportero di Radio Live 99.9 FM, ku ta bale la pena pa por tin un persona manera Edison Rijna komo gezaghèber 6 aña mas. El a sigui konta ku e no konosé gezaghèber bon personalmente, sinembargo e ta tuma nota di su manera di traha. “Un persona simpel i humilde manera ta kantá den nos himno. Un hende ku ta kumindá tur hende i no ta aktua pasobra e ta gezaghèber, i no ta atendé ku esnan kisas ménos konosí den komunidat. Mi ta bisa esaki, pasobra gezaghèber nan sèmper na Boneiru a biba separá ku e hende chikí den komunidat. Mi no ke papia ménos bon di otronan, sinembargo esei ta e bèrdat. Lydia Emerencia tambe tabata un hende sosial, esta poko habri pa hende den komunidat. Sèmper mi sa di esnan ku tabata manehá e posishon komo gezaghèber, ta sinti ku nan ta ariba tur otro hende den tur sentido di palabra. Rijna ta kuminda tur hende, si bo papia kuné e ta dunabo atenshon i si e por yuda, e ta hasié hustamente. No ta pòrnada a dun’é oportunidat pa kontinuá 6 aña mas komo gezaghèber. E ta bon i esnan ku por a hasi kambio, sigur ta skohe pa e mihó desishon. Un hende lo bisa gezaghèber a yuda esei i e ta sali papia yen kos bunita. Sigur gezaghèber  a yudami. No personalmente, sinembargo el a hasi su trabou bon loke a yuda nos tur den komunidat. Pabien un bia mas i éksito, i manera ya ta e kaso, huntu ku komunidat ban pa 6 aña den bon harmonia na bienestar di Boneiru,” e suidadano a bisa.

Share This
error: Content is protected !!