KRALENDIJK – Den boka di pueblo ya pa hopi aña E ta konosí pa e nòmber “Pachi’s Place”, ku ta referí na un sentro nokturno di plaser. E nòmber ofisial ta “Papa Pachi’s” i ta kai bou di e kompania Hotel El Paraiso B.V. , e úniko lugá na Boneiru den su estilo pa e servisio ku e ta ofresé na damanan di bida manera ta bisa. Awe durante dia por a tuma nota di diferente komentario riba entre otro den komunidat i na radio, ku “Pachi’s Place” ta bai habri. Djaweps anochi gezaghèber Edison Rijna a menshoná ku Pachi’s Place tin pèrmit pa por habri su porta, solamente nan mester tene nan mes na e kondishon palabrá. Esaki ta nifiká ku solamente e bar por habri pa duna servisio, esta bendementu di bibida manera un “Snack Bar”. No por atendé ku e damanan na e sitio pa entre otro hasi amor ku nan. Pues si un persona ta deseá pa bebe algu e por bai “Papa Pachi”, dal un serbes sin hasi amor manera ta kustumber. Radio Live 99.9 FM a komprondé di Aries Felix, doño di e negoshi, ku bèrdat e por habri “Pachi’s Place”, sinembargo solamente pa un bar. El a menshoná si ta solamente pa un bar, e no ta habri “Pachi”. Esaki no ta kumbini’e. El a menshoná ku sèmper el a kumpli ku tur rekisito nesesario pa esnan ku ta laborá na “Pachi” i ta kumpli ku tur regla. E ta puntra su mes kiko nos ta besig kuné na Boneiru. Mandatarionan ta sigui krea i aploudí prostitushon ilegal?. Mihó warda momentu ku ta posibel, pa por kontinuá ku e servisio kompletu, manera sèmper “Pachi” a ofresé klientenan.   

Share This
error: Content is protected !!