KRALENDIJK – Riba nos pregunta na sr. Maikel Janga di Fundashon Kompleho Deportivo Jorge Nicolaas relashoná ku e krítikanan ku a bin na publisidat ku sporthal ta sushi, e la bisa promé ku yega na e punto, e ke elaborá riba e historia kòrtiku tokante esaki pa yega na e kulminashon, esaki pa tur hende komprondé kiko ta pasando.

Loke ku a pasa, di akuerdo ku sr. Janga, manera tur hende sa ku nos sporthal ta ser usá durante dia pa sigur tres skol ku tin areglo ku e fundashon ku ta manehá e spòrthal.

Nan ta paga “vergoeding” pa hasi uso di e spòrthal i despues di orario di skol tin sierto otro aktividatnan manera entre otro biar, vòlibòl, futsal etc.

Pa e asuntu di skol tabatin un persona ku lo mester sòru pa limpiesa di e edifisio promé i despues ku e keda usá dor di skolnan, pero debí na e krisis di koronavirùs, mester a stop e servisionan di e persona aki, ya ku no tin entrada i fundashon tampoko no tin entrada pa paga e persona aki.

Aparte di esei tambe tin un beheerder ku ta mas bien pa mantenshon etc.

A kumbiní ku e beheerder ku aktualmente debí na e situashon di koronavirùs, e lo tin di sòru pa mantené un ke otro.

Banda di esei tambe, no tabatin masha kos di hasi pasó tur hende sa ku un di e reglanan tabata ku no por a hasi deporte.

Esei tabata e promé.

Konsientemente siman pasá e fundashon a keda aserká pa un persona pa uso di e sporthal, loke a tuma lugá djaweps i djabièrnè.

Debí ku sa ku skol ta bai kuminsá, a palabra ku e Beheerder ku mester sòru di hasi limpiesa.

A keda kumbiní ku lo hasi esei djadumingu.

Di mes e lo a sòru pa hasi e lugá limpi.

Loke a pasa ta, ku djadumingu ora e beheerder a bai pa hasi limpiesa, e la “Blow”e lugá i momentu ku e la finalisá esaki, e la bai baño pa hasi su nesesidat.

Momentu ku e la bai flùsh, a ripará ku no tin awa.

E la bai kontrolá un ke otro i a konstatá ku tabatin limpiesa ku ‘loader’ patras di e edifisio, i e hende ku a hasi e limpiesa ei lo mester a kibra e pipa di awa i dobla esaki i lage para asina sin avisá ningun hende na sporthal ku e pipa ta kibrá.

Komo ku tabata djadumingu mester a warda djaluna pa solushoná e problema.

Segun sr. Janga mas aleu, lo tabata na su lugá pa informá kiko a pasa i no kore bai media pa hasi un Vruminga un Baka.

Ta esei ta lokual ku a pasa.

Ta konsiente ku ta den temporada di hopi bientu ku hopi stòf i mester limpia e lugá, pero si e beheerder no a bai hasi uso di baño i konstatá ku no tin awa, no tabata sa ku e pipa tabata kibrá i ku no tabatin awa.

Esei tabata e problema ku tabatin, e loke ku a pasa i promé ku a aserká doño di kurpa a opta pa aserká prensa.

Mas eleu riba nos pregunta, sr. Janga a duna di konosé ku nan a haña bon koperashon di Liseo Boneriano ku a bini ku nan hendenan i yuda hasi e lugá limpi.

Djaluna mes e otro skolnan a hasi uso normal di e sporthal.

Ta bon pa bisa tambe ku e dianan aki tin bastante bientu, tur hende sa ku sporthal no tin èrko, mester habri lugá pues pa ventilashon di aire i hopi tera ta drenta.

Share This
error: Content is protected !!