KRALENDIJK – Patrick Dowling general manager di Flamingo TV resientemente a menshoná ku no tin klaridat kon ehekutá deskuento pa Internèt. “A primintí ku ta bai apliká un deskuento di 25 dòler pa usuarionan di Internèt pa islanan BES komo medida di alivio, sinembargo no por duna masha informashon tokante esaki,” tabata loke Dowling a bisa durante un konferensia di prensa e siman aki. El a pidi pa usuarionan tene poko pasenshi i kontinuá ku e pago normal. “Gobièrnu di Hulanda a anunsiá ku entrante luna di mei te luna di desèmber 2020 ta bai duna un deskuento di 25 dòler tur luna, pa esnan ku tin konekshon di internèt fiho. Esaki tin di aber den kuadro di medidanan  di alivio pa islanan BES relashoná ku e impakto di ‘Covid-19’. Gobièrnu di Hulanda i Boneiru a papia di e medida, sinembargo no tin un  bista kla kon ehekut’é. 24 di aprel sekretario di estado Raymond Knops a anunsiá e desishon, sinembargo 27 di aprel a aserka Flamingo TV ku e pregunta si e kompania ta dispuesto pa koperá ku ehekushon di e medida. Flamingo TV ta den deliberashon ku ministerio di asuntunan ekonómiko i medio ambiente, kon pa apliká e medida. Sin un dekreto ministerial no por duna ningun deskuento. Momentu ku yega asina leu pa apliká e deskuento, ta rekerí mas trabou atministrativo, loke ta importante pa tende ken ta bai karga e gastunan. Dowling a menshoná pa tur kliente sigui paga normal, i na momentu ku apliká e deskuento, lo hasi kuenta ku retroaktivo i koregí loke a paga di mas. Pues ta pidi pa tene poko pasenshi i asina e proseso ta kla ta informá e klientenan di e situashon.

Share This
error: Content is protected !!