KRALENDIJK – Señora Erna Solognier a trese su prekupashon kaminda e ta remarka di un kaso di ‘Hit and Run’, ku a tuma lugá na luna di aprel 2020. El a konta ku e kaso ta den man di polis, sinembargo e no a tende nada mas di loke a sosodé ku su outo. “Polis no a duna atenshon sufisiente riba un situashon kaminda un persona manehá un otro vehíkulo a dal den esun dimi i a kore bai for di e sitio, sin pone niun hende na altura di loke a sosodé. E suseso a sosodé 28 di aprel 2:20 di atardi, dilanti di Kria Bon. Un vehíkulo deskonosí a dal den banda di e outo di i a kore bai. A hasi diferente investigashon sinembargo no tin un bista kla ken a kometé e echo, ku polis a bisa ta algu kastigabel. Polis ta atendé ku e kaso, sinembargo nan no a tuma kontakto ku mi persona pa informá kon leu ta ku e investigashon. Polis tin hopi informashon di e trahadónan di Kria Bon, sinembargo no ta hasi esfuerso pa solushoná e kaso. Personalmente mi no tin e forsa finansiero pa drecha e outo. E porta di shofur debí na e impakto no ta habri di pafó, loke ta kousa hopi difikultat pa mi drenta e vehíkulo i maneh’é. Mi ta pidi por fabor esun ku por tin informashon di e loke a sosodé, pa informá polis pa solushoná e kaso,“ Señora Solognier a konta Radio live 99.9 Fm.

Share This
error: Content is protected !!