KRALENDIJK – Chris de Vogel mènedjer di krísis pa kolòm di salubridat i kuido médiko i konsehero di e kolòm aki den EBT, resientemente a menshoná durante un enkuentro ku prensa pa no kere tur loke tin den media. Hopi informashon inkorekto ta sirkulá den media. “E virus di ‘corona’ ta un vírùs nobo i sientífikonan ta hasiendo hopi investigashon i kada dia tin algu nobo i diferente ku e forma di funshonamentu di e vírùs ariba menshoná. Otro kos ku mi ta trese dilanti pa tene kompashon ku esnan ku ta den karentena den nan mes kas. E hendenan aki mester hasi hopi esfuerso pa 14 dia keda den kas òf mas leu ku nan bai ta den kura di nan kas. E kos aki no ta algu fásil. E hendenan den karentena no ta sufri di kebrante di salu, sinembargo nan a regresá Boneiru for di eksterior i pa tur seguridat ta pidi nan pa keda un temporada isolá for di otronan den komunidat,” de Vogel a menshoná. El a sigui bisa:” Laga nos ta orguyoso di nos habitante nan. No hasi manera bo ta polis i no usa ‘Facebook’ komo kódigo penal. Despues di 14 dia bo ta den libertat, esta ku por ta den komunidat,” de Vogel a menshoná. 

Share This
error: Content is protected !!