KRALENDJIK – ‘Between 2 Buns’ awor ta den un edifisio nobo ku e bon servisio di sèmper. No por bisa e servisio a mehorá, debí ku sèmper nan a duna tur ku tin. Loke si por menshoná ku e espasio awor ta mas amplio ku e sitio anterior.

Radio Live 99.9 FM a hasi propietario di restorant ‘Between 2 Buns’ Ana Makaai, un bishita pa tuma nota di sitio nobo di. Un bunita lugá, krea den un bon ambiente pa sinta i disfrutá di un bon ko’i kome, manera ta bisa. Den un kombersashon kòrtiku ku Ana, el a ekspresá kon tur kos ta kana ku e negoshi na e sitio nobo. “Tur kos a kana bon i ainda tin algun kos mas pa kaba pone na lugá manera ta plania. Mi mester gradisí OLB, WEB N.V. i tur otro instansia ku a koperá hopi bon pa tur kos a kana bon i rápido. Un kantidat enorme di hende a presentá e promé dianan ku e tienda a habri su porta. Mi a apresiá kon komunidat ta aseptámi. Mi ta gradisí inmensamente empleadonan, kende ta duna tur ku tin. Huntu ku nan nos por hopi kos, p’esei mi ta hopi gradesido na nan, “Ana a konta. El a menshoná tokante algun servisio ku e tin ku ta nobo, esta tin posibilidat pa grupo di persona reservá i sinta den un sitio apartá. Kisas pa un reunion òf seno familiar, tur ta posibel. Sigur ‘Between 2 Buns’ ta un sitio hopi komentá, sigur pa e bon servisio i banda di esei, un tremendo sabor di loke nan ta ofresé pa kome.

Ana a menshoná na final di e kombersashon: ”Djaki min ta skit pa niun kaminda”.  

Share This
error: Content is protected !!