KRALENDIJK – Na opinion di diputado Elvis Tjin-Asjoe, e ta riparando ku instalashon di asina yamá ‘greenhouse’ ta indispensabel pa logra produkshon grandi di bèrdura i fruta na un manera efisiente. Naturalmente e ta kostoso, pero e mandatario ta kere ku lo por kombensé Hulanda pa finansiá e tipo di fasilidatnan aki pa hende ku ta òf ke bai praktiká hortikultura.

E mandatario tin algun djasabra kaba ta bishitá kunukeronan ku ta embolbí ku hortikultura i krio di bestia. Asina el a bishitá Punta Blanku Chickenfarm, ku ta responsabel pa produkshon di masoménos 12 mil webu diario. Nan tin tambe krio di kabritu i algu di hortikultura.

Diputado Elvis Tjin Asjoe ta kere ku mas i mas Boneiru mester bai den direkshon di produkshon di su mes kuminda, tantu pa medio di agrikultura, hortikultura, krio di bestia i peska. Coronavírùs a pone hopi hende pensa tambe mas tantu den e direkshon aki, spesialmente debí na e temor ku e pandemia aki na sierto momentu lo por a kòrta e suministro di alimento pa e islanan aki.

Djasabra último diputado Tjin Asjoe tabata di bishita na Chaparal, na unda el a mira e hòfi di Bubu Josephia. E ta produsí diferente tipo di bèrdura, manera yambo, sèlder, yuka i algun produkto mas ku e ta entregá na algun supermerkado.
Josephia tin un pos na su kunuku. E awa ta brak, pero e ta kombin’é ku awa di WEB pa muha su matanan. Diputado Tjin Asjoe ta kontentu pa e forma ku Bubu Josephia, na un manera simpel ta logra tòg produsí diferente produkto.

Share This
error: Content is protected !!