KRALENDIJK – Gezaghèber Edison Rijna den entrevista na Radio Live 99.9 FM, a papia tokante situashon aktual relashoná ku ‘Covid-19’ na Boneiru. Ya tin 10 siman ku mundu kompletu ta den un tenshon enorme di e problema di e vírùs, gezaghèber a menshoná. El a sigui bisa:” E relashon ku EBT ta funshoná hopi bon. Boneiru ta un di esnan kompará ku hopi otro no tabatin e nesesidat pa a bai ‘lockdown’. Danki na e gruponan ku ta dirigí e proseso ku tur kos ta kana mihó posibel, huntu ku komunidat ku ta komportá bon. Poulatinamente ta suavisá e medidanan tur kos dependé kon e situashon kontinuá. Aktualmente no tin kaso aktivo registrá na Boneiru, sinembargo no ta nifiká ku no tin hende infektá. E kontròl ta kontinuá. Pa e motibu aki distansia sosial di 1 meter i mei ta importante. Pues esaki ta duna espasio pa por habri frontera.

10 dia pasa nos a tuma desishon ku hende ku bin for di Kòrsou, Aruba i Saba i Sint Eustatius, por bai kas i no 2 siman di karentena na un sitio spesífiko, esta karentena sentral. Nos ta bai risibí informashon pa wak kon ta bai atendé ku e reglanan nobo pa por risibí hende riba e isla. Momentu ku habri frontera i e vírùs presentá na Boneiru lo tuma medida inmediato,”gezaghèber Rijna a bisa. El a papia tambe tokante e 6 kònteinernan ku mester a bin for di Hulanda pa Boneiru.

Gezaghèber Rijna: ”E idea tabata pa haña 6 kònteiner ku ta funshoná pa kuido intensivo. Nan no a bin Boneiru i a bai isla ariba. Loke si Boneiru a risibí ta loke tin den un kònteiner di kuido intensivo. Fundashon Mariadal tin e material i a instalá algun kamber mas na Boneiru ku ta duna e servisio di kuido intensivo. Tin mas ku 40 spesialista aktualmente na Boneiru pa duna man den e kuido, entre otro relashoná ku e vírùs di korona.

Denter di poko ta bai tin posibilidat pa tèst pa ‘corona virus’ na Boneiru, kaminda den 2 ora ta risibí e resultado. Esaki lo ta pronto operashonal. E aparato ya ta na Boneiru, sperando un eksperto for di Hulanda pa pone funshoná. E parti aktualmente pa loke ta trata plan di repartishon ta kana bon. Kada siman tin un ékis kantidat di persona ta regresá Boneiru. Aparte di Repúblika Dominikano tin hende na Venezuela tambe ku mester regresá Boneiru. Si tur kos kana bon pa fin di yüni tur hende den eksterior, i ta inskribí na Boneiru, lo ta aki.

Tin atenshon pa atendé studiantenan den eksterior pa regresá Boneiru. Gobièrnu di Boneiru ta atendé e asuntu di e parti ekonómiko di e isla. Hulanda a proponé pa alargá ku e medidanan ku 3 luna mas, esta e ayudo pa negoshi i hende. Mi ta kontentu kon Hulanda ta asumí su responsabilidat pa islanan BES. Awor nos tin ku bai traha pa lanta e ekonomia i kontinuá,” entre otro gezaghèber Rijna a bisa.

Share This
error: Content is protected !!