KRALENDIJK – Enoc ‘Noki’ Melaan un persona di tur hende, un suidadano a bisa ayera djaweps anochi. Riba kaya un reportero di radio Live 99.9 FM a topa diferente  persona, kendenan tabata remarka riba loke a sosodé ku ‘Noki’ manera nan ta yam’é.

Entre otro por a tende e hendenan komentá loke a sosodé djarason anochi pa djaweps mainta. “E hòmber aki, esta ‘Noki’ ta un persona spesial ku ta nifiká algu pa hopi hende. Ami konosé pa kara i e forma kon tur kos a kana relashoná ku loke a sosodé ku ‘Noki’, ta tremendo,” un persona a bisa. El a sigui konta: ”No ta nesesario konta loke a sosodé, sinembargo miéntras e hòmber tabata pèrdí, un búskeda intensive a tuma lugá pa lokalis’é. E búskeda a inisiá for di djarason anochi, stòp un momentu mardugá i kontinuá mainta trempan. Hopi hende di bario Nort di Saliña a kuminsá yuda pa wak su paradero. Otronan for di bario di Rincon, polis i huntu ku otronan a sali pa buska.

Na mes momentu Pader Alphonsus Baak tabata hasi misa i resa ku famia pa pidi Señor pa esnan ku ta buska topa ku e hòmber pèrdí.

Meskos tabata e kaso durante Santu Sakrifisio di misa na parokia La Bírgen di Coromoto, kaminda ‘Noki’ i su famia ta bishita ku regularidat, a resa huntu pa Señor skucha i yuda.

Danki pa e helikòpter ku a kapta ‘Noki’ den e mondi. No solamente famia, sinembargo komunidat ta hopi kontentu ku a topa ku ‘Noki’. E hòmber tin yu chikitu i nan mester di atenshon di nan tata, loke e ta hasi tambe. Hopi hende ta kontentu, pasobra ta konosí, hende ku pèrdè den e área kaminda ‘Noki’ tabata, pa un òf otro motibu no ta haña nan mas. E miedu aki tabata reina den komunidat. Dios a skucha i a hasi posibel pa nan a skap’é,” e persona a menshoná. Otro kos ku tabata menshoná serka esnan riba kaya, ku ‘Noki’ ta un persona spesial. “Mirando e atenshon ku a duna e hòmber pèrdí, no tin duda ku e ta un persona spesial den su bario entre otro. Hopi hende a yuda den búskeda i ayera anochi a pone un momentu di orashon den bario Nort di Saliña, pa gradisí Señor ku a haña e Norteño pèrdí. Impreshonante!: ”Tabata entre otro loke hendenan tabata komentá. Informashon ku Radio Live 99.9 FM ta disponé di dje, ku Enoc su situashon ta stabil i a traslad’é pa hermana isla Kòrsou pa un kontròl mas interno.  

Share This
error: Content is protected !!