KRALENDIJK – Enoc Melaan kende siman pasá a pèrdè den e mondi grandi den e area di Bopec, a fayesé awe mardugá den hòspital CMC na Kòrsou. Enoc ‘Noki’ Melaan di 39 aña di edat, un persona hopi stimá den e bario di Nort Saliña, siman pasá djarason a bai kue yuana den e mondi patras di BOPEC huntu ku su tio. Dado momentu nan a pèrdè otro. Mesora a bati alarmá i outoridatnan a kuminsa ku un buskeda grandi djarason atardi bai kue anochi sin resultado, i a kontinua ku esaki djaweps mainta trempan. 

Djaweps mèrdia, helikòpter di wardakosta a mira Enoc drumí riba su barika den e mondi. Mesora a hasi e tramitenan huntu ku boluntarionan pa his’e i ku helikòpter a hib’e aeropuerto kaminda ambulans tabata warda pa hib’e hòspital. Na hòspital San Francisco nan a konstatá ku su situashon tabata meresé atenshon médiko mas avansá i mesun anochi a disidí pa traslad’é pa hermana isla Kòrsou.

Awe djaluna 25 di mei 2020 den oranan di mardugá su situashon a empeorá i despues di a lucha pa su bida el a bin fayesé.

Palabra nan di kondolensia i hopi forsa na famia i konosinan di e defuntu.

Share This
error: Content is protected !!