KRALENDIJK – Luguén Gregory Crestian a bai nos dilanti. Un persona hopi alegre tur momentu. Un DJ ku hopi animo pa trese ambiente momentu e ta animá. “Dj Scorpion” ta e nòmber ku e ta usa komo DJ. E no ta un deskonosí na Boneiru. Durante diferente aktividat por tuma nota di “DJ Scorpion”. Mi ta kòrda 2 aña pasa miéntras mi tabata sakando potrèt, mi a tope na “Lixian Xian Surpermarket”. E huntu ku su esposa, miéntras e tabata animá e anochi bispu di aña 2019. El a pidimi pa saka nan potrèt i pone den korant, loke mi a kumpli kuné. Nos ta bon frènt. Momentu ku mi top’é i e ta komo DJ, e mester menshoná mi nòmber den mikrofon pa saludámi públikamente. Nos sa kombersá diferente momentu ku nos topa. No solamente ami, sinembargo ku tur hende e ta habri pa un kombersashon i gosa di bida. Asina e tabata. Sosegá na pas. Dios sostené famia ku a keda tras, i yena e bashí ku ta hasi hopi doló i tristu. Akto di entiero ta tuma lugá djaweps awor pa 3’or di atardi na parokia La Bírgen di Coromoto.

Riba potrèt “Dj Scorpion” ta saludámi, miéntras mi ta sakando su potrèt, durante “Jump up” di Kolegio Kristu Bon Wardador 2020. 

Share This
error: Content is protected !!