KRALENDIJK – E dianan aki ku bientu ta suplando duru, kombiná ku un sekura inmenso. Un suidadano a papia tokante e molèster di stof riba e isla di Boneiru.

”Den transkurso di añanan ta diferente bario ku a keda kreá na Boneiru debí ku habitantenan a traha nan kas na diferente sitio. Hopi parti riba e isla, kaminda ántes tabata mondi, ku tempu a keda poblá i awor un bario. Por ehèmpel Tera Kòrá sùit, Bèlnèm sùit i nort, ‘Punt Vierkant’ , Nawati kompletu, Hato pariba, Rinkon Ser’i Suit, Tanki Matrimonio, Amboina patras i pabou, nèt pa nort di skol Rayo di Solo, Playa Pabou i mas.
Tur kas ta kumpli kabalmente tur aña ku e diferente impuestonan ku nan mester paga tantu di tereno i ‘vastgoed’ entre otro. Tur kas tin mínimo 1 outo loke tur aña ta paga impuesto p’e. Ku konstrukshon di kada kas, ekonomia di Boneiru a haña un ‘boost’ debí na kumpramentu di material entre otro. Komersiante i empresarionan di kontratista, ‘hardware stores’, negoshinan di santu i blòki, tur ta paga nan impuesto di ganashi na gobièrnu. Asina por sigui menshoná hopi kos ku durante añanan a yuda e kaha di gobièrnu.

Dikon e bario nan i nan habitante no por biba di forma digno nèchi ku kamindanan di asfalt i asera pa evitá e andanada di tera i stòf ku ta hasi hende malu i ta susha e kasnan inmensamente. Mayoria parti di aña ta seku ku bientu. E bientu so ya ta lanta hopi stòf inmensamente rònt Boneiru. No papia di e momentu ku vehíkulonan ta kore riba e kaminda di tera. Ta laman di tera i stòf ta yena e kasnan. Hende ku nunka a sufri di alergia ta bira pashènt di alergia. Hendenan ta laba outo na kas, promé ku nan ke subi kaminda di asfalt ya e vehíkulo ta tur na stòf kaba. Ora awa yobé, ta un lodo fis pa outo kore i hende kana aden. Asaltando e área den bario nan i poniendo asera ta hasi e bario bunita i agradabel pa biba. Banda di ku kayanan ya eksistente di asfalt ta tur kibrá e bario nan menshoná tin hopi nesesidat pa asfalt i hasí bario nan desente pa biba. Muchanan por kore baiskel huntu i hunga den bario sin mester susha kurpa tur na tera. Mi ta puntra mi mes si gobièrnu no ta pensa pa pidi Hulanda yuda pa manda 1 òf 2 kompania di ‘wegenbouw’ for di Hulanda, a lo ménos pa un temporada, kisas 2 aña pa asistí esun di Boneiru ya asina por drecha i traha mas tantu kaminda posibel. Ta kue den bario nan i e kayanan ku pa años ta sklama pa renobashon na mes momentu.

Momentu ku tur bario ku ta di tera ta asfaltá, e tera i stòf ta baha drástikamente. Laga e pueblo mira trabou. Laga e pueblo mira asfalt kore di bèrdat. Hasi Boneiru i su barionan bunita. Duna nos un smak pa bai urna aki 3 aña bai vota,” e suidadano a menshoná.

Share This
error: Content is protected !!