KRALENDIJK – USIBO internamente ta  enbuska di alternativa pa e temporada difisil ku nos ta bai enkontrá relashoná ku e efektonan di Covid-19. Nos semper a bisa ku nos no por drumi warda, pero nos mester ta pro-aktivo sabiendo kiko ta wardando nos. Ta un echo ku nos situashon ekonómiko lo bai dura basta promé ku e rekuperá i bai drai bèk na un nivel ku nos tabatin promé ku 13 di mart di e aña aki.;

USIBO den representashon di e klase trahadó, kier duna nos granito na bini ku posibel solushonnan ku mester bai garantisá kuponan di trabou pa gran parti ku ta kai  den e sektor di Horeca en partikular, kual ta e sektor ku mas nos ta mira ku lo bai pasa den tempunan  hopi difisil relashoná ku e Covid-19. Opviamente esaki ta konta pa tur e sektornman ku nan eksistensia pa gran parti ta dependé di e industria di turismo.

Loke mester bai pasa mas pronto ku ta posibel ta pa nos por yega na plannan konkreto pa sa den ki direkshon nos kier hiba nos isla den e tempunan difisil ku tin na horizonte. E ehersisionan ku mester bai hasi ta rekerí un kontribushon di tur partido envolví, esta tur nanishi mester ta den mes un direkshon. Nos ta kere ku awor ku Ulanda a bai di akuerdo pa prolongá ku tres luna mas e 80% di salarionan, laga nos usa e tempo aki pa krea mas tanto  kuponan di trabou pa esnan ku lo por bai kai afó, pero bou di kondishon ku na momento ku situashon normalisá nan ta esnan proméyamá pa regresá nan puesto di trabou. Ban usa e tempo aki pa laga e trahadónan ku ta dispuesto na siña un fishi nobo haña e oportunidat pa hasi esaki. Ban usa e tres luna nan aki pa laga e trahadó bai henter siman kuater (4) ora of mas na su futuro fuente di empleo.

Share This
error: Content is protected !!