KRALENDIJK – Informashonnan ku a yega nos redakshon fin di siman pasá, pa ta eksakto djadumingu último, ta mustra ku e DT di s.v. Real Rincon ku ta Robert “Oby” Winklaar, a tuma su retiru fo’i e kampionnan di s.v. Real Rincon.

Despues di a tuma nota di un publikashon ku e mes a pone riba ‘facebook’, nos a trata na establesé kontakto ku sr. Winklaar pero no a logra.

Mesora nos a tuma kontakto ku e presidente di s.v. Real Rincon, sr. Carlos Pourier, ku a konfirmá pa nos ku e informe ta korekto.

Tabata un siman i mei pasá ku s.v. Real Rincon a risibí e karta di retiru di sr. Winklaar ku pa medio di esaki ta pidi su retiru fo’i s.v. Real Rincon.

Direktiva di s.v. Real Rincon tabata sa ku esaki lo a bini ya ku na kuminsamentu dje temporada (kampionato), sr. Winklaar a duna di konosé ku awor si ta su último temporada. For di dia ku e la kue kampion kopa ABC ku s.v. Real Rincon, ya e kier a bai. Pero nos a papia kuné i bisé pa keda un aña mas. Pero e la keda te asta 2 aña mas.

Di e forma aki pues, sr. Robert “Oby” Winklaar ku tabatin éksitoso temporadanan ku e kampionnan di s.v. Real Rincon komo DT, ta bandoná e organisashon di s.v. Real Rincon. Oby a logra 3 título di kampion ku e ekipo di Real Rincon, 1 kampion Kopa ABC, 3er lugá Concacaf i 1 kampion Super Kopa.

E kampionato 2019/2020 ku a keda deklará nulo, Real Rincon di forma invikto tabata komandando e tabla di posishon ku 31 punto.

Pourier: “Ya nos a sinta pa kuminsá pone nòmbernan pa posibel remplaso, paso pa haña un mes bon òf mihó ku Oby, no ta fasil.”

No ta konosí pa nos si sr. Winklaar lo bai un otro klup di futbòl ya ku nos no a logra establesé kontakto kuné. Tampoko ta konosí kua ta e próksimo DT di e ekipo kampion.

Share This
error: Content is protected !!